ചാൾസ് രാജാവിന്റെ ഛായാചിത്രം ഉൾക്കൊള്ളുന്ന പുതിയ യുകെ നാണയങ്ങൾ അനാച്ഛാദനം ചെയ്തു

ബ്രിട്ടനിലെ ചാൾസ് മൂന്നാമൻ രാജാവിന്റെ ഔദ്യോഗിക പ്രതിരൂപ നാണയം റോയൽ മിന്റ് അനാച്ഛാദനം ചെയ്തു. ഡിസംബറോടെ സ്റ്റെർലിംഗ് ഉപയോഗിക്കുന്ന ആളുകൾക്ക് രാജാവിന്റെ ചിത്രം കാണാൻ സാധിക്കും. ചാൾസിനെ ചിത്രീകരിക്കുന്ന 50p നാണയങ്ങളാണ് പ്രചാരത്തിലുള്ളത്.
എലിസബത്ത് രാജ്ഞിയുടെ ജീവിതത്തെയും പാരമ്പര്യത്തെയും അനുസ്മരിക്കുന്ന ഒരു സ്മാരക നാണയ ശ്രേണിയും തിങ്കളാഴ്ച രാവിലെ 9 മണിക്ക് പുറത്തിറക്കും. രാജാവിന്റെ ഛായാചിത്രം ആദ്യം രാജ്ഞിയെ അനുസ്മരിക്കുന്ന ഒരു പ്രത്യേക £5ലും 50 പൈസയിലും ദൃശ്യമാകും.

ഒക്‌ടോബർ മുതൽ ഉപഭോക്താക്കൾക്ക് ഈ സ്മാരക ശ്രേണി ലഭിക്കുമെന്ന് പ്രതീക്ഷിക്കുന്നുവെന്നും 50p മെമ്മോറിയൽ സർക്കുലേറ്റിംഗ് നാണയം ഡിസംബറോടെ ലഭ്യമാക്കാൻ കഴിയുമെന്നും പ്രതീക്ഷിക്കുന്നുവെന്നും റോയൽ മിന്റ് ചീഫ് കൊമേഴ്‌സ്യൽ ഓഫീസർ നിക്കോള ഹോവൽ പറഞ്ഞു. മാർട്ടിൻ ജെന്നിംഗ്‌സാണ് രാജാവിന്റെ പ്രതിരൂപം സൃഷ്ടിച്ചതെന്നും ചാൾസ് വ്യക്തിപരമായി അംഗീകരിച്ചതാണെന്നും മിന്റ് വെളിപ്പെടുത്തി.

പാരമ്പര്യത്തിന് അനുസൃതമായി, രാജാവിന്റെ ഛായാചിത്രം ഇടതുവശത്ത് എലിസബത്ത് രാജ്ഞിയുടെ എതിർ ദിശയിലാണ്. മുൻ ബ്രിട്ടീഷ് രാജാക്കന്മാരെപ്പോലെയും രാജ്ഞിയിൽ നിന്ന് വ്യത്യസ്തമായും നാണയത്തിൽ ചാൾസ് കിരീടം ധരിക്കുന്നില്ല. പ്രതിരൂപതിന് ചുറ്റുമുള്ള ലാറ്റിൻ ലിഖിതം “CHARLES III D G REX F D 5 POUNDS 2022” (“ചാൾസ് മൂന്നാമൻ രാജാവ്, ദൈവകൃപയാൽ, വിശ്വാസത്തിന്റെ സംരക്ഷകൻ”) എന്ന് അടയാളപ്പെടുത്തിയിരിക്കുന്നു. വരും മാസങ്ങളിൽ റോയൽ മിന്റ് നിർമ്മിക്കുന്ന പ്രചാരത്തിലുള്ള നാണയങ്ങളിലും സ്മാരക നാണയങ്ങളിലും ഈ പ്രതിരൂപം പ്രത്യക്ഷപ്പെടാൻ തുടങ്ങും. £5 നാണയത്തിന്റെ മറുവശത്ത് എലിസബത്ത് രാജ്ഞിയുടെ രണ്ട് പുതിയ ഛായാചിത്രങ്ങളും കാണാം. റോയൽ മിന്റുമായി സഹകരിച്ച് ആർട്ടിസ്റ്റ് ജോൺ ബെർഗ്ഡാൽ ആണ് ഡിസൈൻ സൃഷ്ടിച്ചത്.
ഇത് വിശാലമായ ഒരു സ്മാരക നാണയ ശേഖരത്തിന്റെ ഭാഗമാകും.

സൗത്ത് വെയിൽസിലെ ലാൻട്രിസന്റ് ആസ്ഥാനമാക്കി പ്രവർത്തിക്കുന്ന റോയൽ മിന്റ് 1,100 വർഷത്തിലേറെയായി ബ്രിട്ടീഷ് രാജകുടുംബത്തെ നാണയങ്ങളിൽ ചിത്രീകരിച്ചിട്ടുണ്ട്. ആൽഫ്രഡ് ദി ഗ്രേറ്റ് മുതൽ ഓരോ രാജാവിനെയും അവർ നാണയങ്ങളിൽ രേഖപ്പെടുത്തിയിട്ടുണ്ട്.

രാജ്ഞിയുടെ പ്രതിമയുള്ള എല്ലാ യുകെ നാണയങ്ങളും നിയമപരവും സജീവ പ്രചാരത്തിലുമായിരിക്കും. ചരിത്രപരമായി, വിവിധ രാജാക്കന്മാരുടെ പ്രതിമകൾ ഉൾക്കൊള്ളുന്ന നാണയങ്ങൾ ഒരുമിച്ച് പ്രചരിക്കുന്നത് പാരിസ്ഥിതിക ആഘാതവും ചെലവും കുറയ്ക്കാൻ സഹായിക്കുന്നു. എലിസബത്ത് രാജ്ഞിയുടെ പ്രതിമയുള്ള ഏകദേശം 27 ബില്യൺ നാണയങ്ങൾ നിലവിൽ യുകെയിൽ പ്രചരിക്കുന്നുണ്ട്. കാലക്രമേണ, കേടുപാടുകൾ സംഭവിക്കുകയോ തേയ്മാനം സംഭവിക്കുകയോ ചെയ്യുമ്പോൾ, അധിക നാണയങ്ങളുടെ ആവശ്യം നിറവേറ്റുന്നതിനായി ഇവ മാറ്റിസ്ഥാപിക്കും.