ശമ്പള തർക്കം രൂക്ഷം: നോർത്ത് അയർലണ്ടിൽ റെസിഡന്റ് ഡോക്ടർമാർ പണിമുടക്കുന്നു

നോർത്ത് അയർലണ്ടിലുടനീളമുള്ള റെസിഡന്റ് ഡോക്ടർമാർ ശമ്പള പുനഃസ്ഥാപനം ആവശ്യപ്പെട്ട് 24 മണിക്കൂർ പണിമുടക്കിന് തുടക്കമിട്ടു. തിങ്കളാഴ്ച രാവിലെ 7 മണിക്ക് ആരംഭിച്ച സമരം ചൊവ്വാഴ്ച രാവിലെ 6.59 വരെ തുടരും. ആശുപത്രികളിലും ജനറൽ പ്രാക്ടീഷണർ (GP) സേവനങ്ങളിലും ക്ലിനിക്കൽ പരിശീലനത്തിലുള്ള യോഗ്യത നേടിയ ഡോക്ടർമാരാണ് സമരത്തിൽ പങ്കെടുക്കുന്നത്. കഴിഞ്ഞ ആഴ്ച കൺസൾട്ടന്റുമാരും സ്പെഷ്യലിസ്റ്റ് ഡോക്ടർമാരും നടത്തിയ സമരത്തിന് പിന്നാലെയാണ് പുതിയ പ്രതിഷേധം.

Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2

2025-26 ലെ ജനറൽ മെഡിക്കൽ സർവീസസ് (GMS) കരാർ ആരോഗ്യവകുപ്പ് ഏകപക്ഷീയമായി നടപ്പാക്കിയതിനെതിരെ നോർത്ത് അയർലണ്ടിലെ എല്ലാ ഡോക്ടർമാരും തർക്കത്തിലാണെന്ന് ബ്രിട്ടീഷ് മെഡിക്കൽ അസോസിയേഷൻ (BMA) അറിയിച്ചു. ബി.എം.എയുടെ നോർത്ത് അയർലണ്ട് റെസിഡന്റ് ഡോക്ടേഴ്‌സ് കമ്മിറ്റി ചെയർമാൻ ഡോ. സ്റ്റീവൻ മോണ്ട്ഗോമറി പറഞ്ഞു: “2008 മുതൽ റെസിഡന്റ് ഡോക്ടർമാരുടെ ശമ്പളത്തിന് 20 ശതമാനം വരെ മൂല്യത്തകർച്ച സംഭവിച്ചിട്ടുണ്ട്. കൂടാതെ, യുകെയിലെ മറ്റ് പ്രദേശങ്ങളിലെയും അയർലണ്ട് റിപ്പബ്ലിക്കിലെയും ഡോക്ടർമാരെ അപേക്ഷിച്ച് ഞങ്ങൾ പിന്നിലാണ്.”

രോഗികളുടെ എണ്ണം വർധിക്കുമ്പോഴും ആവശ്യത്തിന് ഡോക്ടർമാരില്ലാത്തതും, മെച്ചപ്പെട്ട ശമ്പളവും തൊഴിൽ സാഹചര്യങ്ങളും തേടി യുവ ഡോക്ടർമാർ ആരോഗ്യ സേവനം വിട്ടുപോകുന്നതും ആരോഗ്യ മേഖലയെ ഗുരുതര പ്രതിസന്ധിയിലാക്കിയെന്നും അദ്ദേഹം പറഞ്ഞു. അതേസമയം, ആരോഗ്യ മന്ത്രി മൈക്ക് നെസ്ബിറ്റ് സമരത്തിൽ നിരാശ പ്രകടിപ്പിച്ചു. ഭൂരിഭാഗം ആരോഗ്യ സേവനങ്ങളും സാധാരണ നിലയിൽ തുടരുമെന്നും, നിശ്ചയിച്ചിട്ടുള്ള ചികിത്സാ-പരിശോധനാ അപ്പോയിന്റ്മെന്റുകൾ മാറ്റിയിട്ടുണ്ടെങ്കിൽ മാത്രമേ രോഗികളെ നേരിട്ട് അറിയിക്കുകയുള്ളൂവെന്നും അദ്ദേഹം വ്യക്തമാക്കി.

സ്വതന്ത്ര ഡോക്ടേഴ്സ് ആൻഡ് ഡെന്റിസ്റ്റ്സ് പേ റിവ്യൂ ബോഡി ശുപാർശ ചെയ്ത ശമ്പളവർധന നടപ്പാക്കാൻ സർക്കാർ പ്രതിജ്ഞാബദ്ധമാണെങ്കിലും, സ്റ്റോർമോണ്ട് മന്ത്രിസഭ വാർഷിക ബജറ്റ് അംഗീകരിച്ച ശേഷമേ അത് സാധ്യമാകൂവെന്നും മന്ത്രി പറഞ്ഞു. സമരത്തിന് നോർത്ത് അയർലണ്ടിലെ ആകെ ഡോക്ടർമാരിൽ 24.8 ശതമാനം പേരുടെ മാത്രമാണ് പിന്തുണയെന്നും, തുടർച്ചയായ ആരോഗ്യസേവനം ഉറപ്പാക്കാൻ ജോലിയിൽ തുടരുന്ന ഡോക്ടർമാർക്ക് അദ്ദേഹം നന്ദി അറിയിച്ചു. 2026-27 സാമ്പത്തിക വർഷത്തേക്കുള്ള ശമ്പളവർധനയായി 3.5 ശതമാനം ശുപാർശ ചെയ്തിട്ടുണ്ടെന്നും, കഴിഞ്ഞ മൂന്ന് വർഷത്തിനിടെ റെസിഡന്റ് ഡോക്ടർമാർക്ക് ശരാശരി 30 ശതമാനം ശമ്പളവർധന ലഭിച്ചിട്ടുണ്ടെന്നും മന്ത്രി കൂട്ടിച്ചേർത്തു.

Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S

Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==