ന്യൂഡൽഹി: മാധ്യമപ്രവര്ത്തകന് സിദ്ദിഖ് കാപ്പനെ വിദഗ്ധ ചികിത്സയ്ക്കായി ഡൽഹിയിലേക്ക് മാറ്റണമെന്ന് സുപ്രീംകോടതി. ദില്ലി എയിംസിലേക്കോ ആര്.എം.എല് ആശുപത്രിയിലോ ചികിത്സ നല്കണമെന്നാണ് കൊടതിയുടെ നിര്ദേശം. ആരോഗ്യസ്ഥിതി മെച്ചപ്പെട്ട ശേഷം ജാമ്യത്തിനായി അപേക്ഷിക്കാമെന്നും കോടതി പറഞ്ഞു. കാപ്പന് അടിയന്തര ചികിത്സ നല്കണമെന്ന ഹരജിയിലാണ് കോടതിയുടെ തീരുമാനം.
കാപ്പന്റെ ആരോഗ്യനില സംബന്ധിച്ച് യു.പി സര്ക്കാര് സുപ്രീം കോടതിയില് റിപ്പോര്ട്ട് സമര്പ്പിച്ചിരുന്നു. കാപ്പന് കൊവിഡ് ബാധിതനായിരുന്നെന്നും അദ്ദേഹത്തിന് വേണ്ട ചികിത്സ നല്കിയിട്ടുണ്ടെന്നും അദ്ദേഹത്തെ തിരികെ ജയിലില് എത്തിച്ചിട്ടുണ്ടെന്നുമാണ് റിപ്പോര്ട്ടില് പറഞ്ഞത്.
അതേസമയം ഗുരുതരമായ പരിക്ക് പറ്റിയതിനെ തുടര്ന്നാണ് അദ്ദേഹത്തെ ആശുപത്രിയിലേക്ക് മാറ്റിയതെന്നാണ് കാപ്പന്റെ അഭിഭാഷകന് പ്രതികരിച്ചത്.
