കൊച്ചി: പന്തീരങ്കാവ് യു.എ.പി.എ കേസില് അലനും താഹയ്ക്കും ജാമ്യം. എന്.ഐ.എ കോടതിയാണ് ജാമ്യം അനുവദിച്ചത്. ഉപാധികളോടെയാണ് ജാമ്യം.
ഒരു ലക്ഷം രൂപയുടെ ബോണ്ട് സമര്പ്പിക്കണമെന്ന് കോടതി അറിയിച്ചു. എല്ലാ മാസവും സ്റ്റേഷനില് ഒപ്പ് രേഖപ്പെടുത്തണം. അറസ്റ്റ് ചെയ്ത് പത്ത് മാസങ്ങള്ക്ക് ശേഷമാണ് ജാമ്യം അനുവദിച്ചത്.
തങ്ങള്ക്കെതിരായ കേസില് തെളിവുകള് ഇല്ലെന്നും അന്യായമായി തടങ്കലില് വെച്ചിരിക്കുകയാണെന്നും ഇരുവരും ജാമ്യഹരജിയില് പറഞ്ഞിരുന്നു. എന്നാല് ഇരുവരുടേയും മാവോയിസ്റ്റ് ബന്ധത്തില് തെളിവുണ്ടെന്നായിരുന്നു എന്.ഐ.എയുടെ വാദം.
2019 നവംബര് ഒന്നിനായിരുന്നു കോഴിക്കോട പന്തീരങ്കാവിലെ വീട്ടില് നടത്തിയ റെയ്ഡിന് പിന്നാലെ അലനേയും താഹയേയും അറസ്റ്റ് ചെയ്തത്. മാവോയിസ്റ്റ് ലഘുലേഖയും ബാനറും വീട്ടില് നിന്ന് കണ്ടെടുത്തെന്നായിരുന്നു പൊലീസ് പറഞ്ഞത്.
ഏപ്രില് 27 നാണ് ദേശീയ അന്വേഷണ ഏജന്സി ഇരുവര്ക്കുമെതിരായ കുറ്റപത്രം കൊച്ചി എന്.ഐ.എ കോടതിയില് സമര്പ്പിച്ചത്.
