കുവൈറ്റ് സിറ്റി: കുവൈത്തിന്റെ ദേശീയ അസംബ്ലിയിൽ (പാർലമെന്റ്) ഒരു പ്രത്യേക സെഷനിൽ, നിലവിലെ 62 അംഗങ്ങളിൽ 61 പേർ ബജറ്റിൽ നിന്ന് 600 ദശലക്ഷം കുവൈറ്റ് ദിനാർ കോവിഡ്-19 മുൻ‌നിര തൊഴിലാളികൾക്ക് പ്രതിഫലമായി വിതരണം ചെയ്യാൻ അംഗീകരിച്ചു. ഇന്നലെ ചേര്‍ന്ന പ്രത്യേക സമ്മേളനത്തിലാണ് ബോണസ് നല്‍കുന്നതിന് അംഗീകാരം നല്‍കിയത്.
ആഭ്യന്തര – ആരോഗ്യ മന്ത്രാലയങ്ങളിലെ മുന്‍നിര പ്രവര്‍ത്തകര്‍, സിവില്‍ സര്‍വീസ് കമ്മീഷന് കീഴിലുള്ള സര്‍ക്കാര്‍ ഏജന്‍സികളിലെ ജീവനക്കാര്‍, പ്രതിരോധ പ്രവര്‍ത്തനുമായി ബന്ധപ്പെട്ടുള്ള മറ്റ് തൊഴിലാളികള്‍ എന്നിങ്ങനെ ബോണസിന് അര്‍ഹരായവരെ മൂന്നു വിഭാഗമായി തിരിച്ചിട്ടുണ്ട്. അതേസമയം, ജോലിക്കിടയില്‍ കോവിഡ് ബാധിച്ച് മരണമടഞ്ഞവരെ കുവൈത്ത് രക്തസാക്ഷികളായി പരിഗണിക്കുമെന്നും അധികൃതർ വ്യക്തമാക്കി.
മലയാളികളടക്കമുള്ള അനവധി ജീവനക്കാര്‍ക്ക് ഇതിന്‍റെ പ്രയോജനം ലഭിക്കും. കൂടാതെ, ഓരോ മൂന്നുമാസത്തിലും ഒരു ആനുകാലിക റിപ്പോർട്ട് തയ്യാറാക്കുന്നതിന് ഓഡിറ്റ് ബ്യൂറോയെ ചുമതലപ്പെടുത്തി. കൂടാതെ സുതാര്യത ഉറപ്പുവരുത്തുന്നതിനായി എല്ലാ പ്രതിഫലങ്ങളും വിതരണം ചെയ്തുകഴിഞ്ഞാൽ സർക്കാർ റിപ്പോർട്ട് സമർപ്പിക്കേണ്ടതുണ്ടെന്നും അധികൃതർ അറിയിച്ചു.
