ന്യൂഡല്ഹി: നിയമസഭാ കയ്യാങ്കളിക്കേസ് പിന്വലിക്കണമെന്നാവശ്യപ്പെട്ട് സംസ്ഥാന സര്ക്കാര് നല്കിയ അപേക്ഷ സുപ്രീം കോടതി തള്ളി. കേസിലെ പ്രതികളായ വിദ്യാഭ്യാസ മന്ത്രി വി. ശിവന്കുട്ടി, ഇ.പി. ജയരാജന്, കെ.ടി. ജലീല്, കെ. കുഞ്ഞമ്മദ്, സി.കെ. സദാശിവന്, കെ. അജിത് എന്നിവര് വിചാരണ നേരിടണമെന്ന് ജസ്റ്റിസ് ഡി.വൈ. ചന്ദ്രചൂഡ് അധ്യക്ഷനായ രണ്ടംഗ ബെഞ്ച് വിധി. സഭയുടെ പരിരക്ഷ ജനപ്രതിനിധികള് എന്ന നിലയില് മാത്രമാണെന്നും ക്രിമിനല് കുറ്റത്തില് നിന്നുമുള്ള പരിരക്ഷയല്ലെന്നും ജസ്റ്റിസ് ചന്ദ്രചൂഡ് വിധിപ്രസ്താവയിൽ ചൂണ്ടിക്കാട്ടി. പൊതുമുതല് നശിപ്പിക്കുന്നത് അഭിപ്രായ സ്വാതന്ത്ര്യത്തിന്റെ പരിധിയില് ഉള്പ്പെടുത്താനാവില്ലെന്നും കോടതി പറഞ്ഞു.
2015 മാര്ച്ച് 13-നാണ് വിവാദമായ നിയമസഭാ കയ്യാങ്കളി നടക്കുന്നത്. ബാര് കോഴ വിവാദത്തില് ഉള്പ്പെട്ട അന്നത്തെ ധനമന്ത്രി കെ.എം. മാണിയെ ബജറ്റ് അവതരിപ്പിക്കാന് അനുവദിക്കില്ലെന്ന എല്.ഡി.എഫ്. എം.എല്.എമാരുടെ നിലപാടാണ് കയ്യാങ്കളിയിലേക്ക് നയിച്ചത്.
സംസ്ഥാനസര്ക്കാരിനുപുറമേ കേസില് പ്രതികളായ വി. ശിവന്കുട്ടി, ഇ.പി. ജയരാജന്, കെ.ടി. ജലീല്, കെ. കുഞ്ഞമ്മദ്, സി.കെ. സദാശിവന്, കെ. അജിത് എന്നിവരും സുപ്രീംകോടതിയെ സമീപിച്ചിരുന്നു. ജസ്റ്റിസ് എം.ആര്. ഷാ ആയിരുന്നു ബെഞ്ചിലെ രണ്ടാമത്തെ അംഗം.
