ടോക്യോ: ഒളിമ്പിക്സില് പുരുഷന്മാരുടെ 4×400 മീറ്റര് റിലേയില് ഏഷ്യന് റെക്കോഡ് പ്രകടനവുമായി ഇന്ത്യന് ടീം. ഹീറ്റ്സ് രണ്ടില് മത്സരിച്ച ഇന്ത്യ 3:00.25 സെക്കന്റില് ഫിനിഷിങ് ലൈന് തൊട്ടു. ഖത്തറിന്റേ പേരിലുള്ള ഏഷ്യന് റെക്കോഡാണ് ഇന്ത്യ തിരുത്തിയത്. മുഹമ്മദ് അനസ് യഹിയ, നോഹ നിര്മല് ടോം, ആരോക്യ രാജീവ്, അമോജ് ജേക്കബ് എന്നിവരാണ് ഇന്ത്യക്കായി ട്രാക്കിലിറങ്ങിയത്. മുഹമ്മദ് അനസ് യഹിയ, നോഹ നിര്മല് ടോം, അമോജ് ജേക്കബ് എന്നിവർ മലയാളി താരങ്ങളാണ്.
ഹീറ്റ്സ് രണ്ടില് നാലാം സ്ഥാനത്ത് ഫിനിഷ് ചെയ്തെങ്കിലും ഇന്ത്യക്ക് ഫൈനല് യോഗ്യത നേടാനായില്ല. എന്നാല് കരുത്തരായ ജപ്പാനും ഫ്രാന്സിനും ദക്ഷിണാഫ്രിക്കയ്ക്കും കൊളംബിയക്കും മുന്നിലെത്താനായി. ഈ ഹീറ്റ്സില് നിന്ന് പോളണ്ടും ജമൈക്കയും ബെല്ജിയവുമാണ് ഫൈനലിലെത്തിയത്.
