ദുബായ്: അശ്രദ്ധയായി വാഹനം ഓടിച്ചതിനും പോലീസ് പട്രോളിംഗ് വാഹനത്തിനുനേരെ കാറ് ഇടിച്ചുകയറ്റിയതിനും രണ്ട് പ്രായപൂർത്തിയാകാത്തവരെ ദുബായ് പോലീസ് അറസ്റ്റ് ചെയ്തു. 15 നും 14 നും ഇടയിൽ പ്രായമുള്ള രണ്ട് ആൺകുട്ടികളെ നിയമവിരുദ്ധമായി വാഹനമോടിച്ചു, ജീവൻ അപകടത്തിലാക്കി, പൊതു സ്വത്തിന് നാശനഷ്ടം വരുത്തിയെന്ന കുറ്റത്തിന് ദുബായ് പബ്ലിക് പ്രോസിക്യൂഷന് മുമ്പാകെ ഹാജരാക്കി.
പുലർച്ചെ 4 മണിയോടെയായിരുന്നു സംഭവം നടന്നത്. ഇവർ ഓടിച്ചിരുന്ന വാഹനം അമിത വേഗതയിലെത്തിയപ്പോൾ പോലീസ് പട്രോളിംഗ് സംഘം വാഹനം നിർത്താൻ സിഗ്നൽ നൽകി. എന്നാൽ വാഹനം ഓടിച്ച പതിനാലുകാരൻ അത് നിരസിക്കുകയും പട്രോളിംഗ് വാഹനത്തിനുനേരെ കാറ് ഇടിച്ചുകയറ്റുകയും ചെയ്തു.
കൂടാതെ ട്രാഫിക് സിഗ്നൽ പാലിക്കാതെ എതിർദിശയിൽ വാഹനം ഓടിച്ച പ്രതികൾ റോഡിൽ യാത്ര ചെയ്തിരുന്ന ആളുകളുടെ ജീവൻ അപകടത്തിലാക്കുകയും ചെയ്തു. പ്രായപൂർത്തിയാകാത്തയാൾ സഹോദരനോട് പറയാതെ അയാളുടെ വാഹനം എടുത്തതാണെന്ന് അന്വേഷണത്തിൽ വ്യക്തമായി. രണ്ട് പേരെയും ദുബായ് പബ്ലിക് പ്രോസിക്യൂഷന് മുമ്പാകെ ഹാജരാക്കിയിട്ടുണ്ട്.
