തിരുവനന്തപുരം: പത്തനംതിട്ടയില് രണ്ട് പേര്ക്ക് കൂടി കോവിഡ് 19 സ്ഥിരീകരിച്ചു. ഇറ്റലിയില് നിന്നെത്തിയവരുടെ കുടുംബ സുഹൃത്തുക്കള്ക്കാണ് രോഗം സ്ഥിരീകരിച്ചത്. ഇവര് കോഴഞ്ചേരി ആശുപത്രിയില് ചികിത്സിയിലാണ്.
ഏറ്റവും ഒടുവില് ആറ് പേര്ക്ക് കൂടി കൊറോണ വൈറസ് ബാധ സ്ഥിരീകരിച്ചിരിക്കുന്നു. ഇതോടെ സംസ്ഥാനത്താകെ കോവിഡ് 19 ബാധിച്ചവരുടെ എണ്ണം 15 ആയി. ഇതില് മൂന്ന് പേരുടെ രോഗം പൂര്ണമായി മാറി. ഇപ്പോള് ചികിത്സയിലുള്ള 12 പേരില് നാല് പേര് ഇറ്റലിയില് നിന്ന് വന്നവരാണ് 8 പേര് അവരുമായി സമ്പര്ക്കം പുലര്ത്തിയവരാണ്.
1116 പേര് നിരീക്ഷണത്തിലുണ്ട്. ഇവരില് 967 പേര് വീടുകളിലാണ് 149 പേര് ആശുപത്രിയിലുണ്ട്.
കോവിഡ് വൈറസ് ബാധയുടെ പശ്ചാത്തലത്തില് സംസ്ഥാനത്ത് അതീവ ജാഗ്രത നിര്ദ്ദേശമാണുള്ളത്. സംസ്ഥാനത്താകെ പൊതുപരിപാടികള് നിര്ത്തിവെക്കാന് തീരുമാനിച്ചിട്ടുണ്ട്. ഏഴുവരെയുള്ള ക്ലാസുകള്ക്ക് അവധി നല്കിയിട്ടുണ്ട്. അങ്കണവാടികള്ക്കും അവധിബാധകമായിരിക്കും. ഏഴാം ക്ലാസുവരെയുള്ള ബാക്കി പരീക്ഷകള് നിര്ത്തിവെച്ചു. 8,9,10 ക്ലാസ്സുകളിലെ പരീക്ഷകള്ക്ക് മാറ്റമില്ല.ഈ മാസം മുഴുവന് നിയന്ത്രണം തുടരും.
പത്തനംതിട്ടയില് അഞ്ച് പേര്ക്കും എറണാകുളത്ത് ഒരു കുട്ടിക്കും നേരത്തെ കോവിഡ് 19 സ്ഥിരീകരിച്ചിരുന്നു.
പത്തനംതിട്ടയില് 5 പേര്ക്ക് കോവിഡ് 19 സ്ഥിരീകരിച്ചതിന് പിന്നാലെ 07.03.2020ന് ഇറ്റലിയില് നിന്ന് കേരളത്തിലേക്ക് മടങ്ങിയെത്തിയ കണ്ണൂര് സ്വദേശിയായ 3 വയസുള്ള കുട്ടിക്ക് കോവിഡ് 19 രോഗബാധ സ്ഥിരീകരിച്ചിരുന്നു. നിലവില് ആശുപത്രിയില് പ്രവേശിപ്പിക്കപ്പെട്ട ആരുടേയും ആരോഗ്യനിലയില് ആശങ്കയ്ക്ക് വകയില്ല.
102 ലോക രാജ്യങ്ങളില് കോവിഡ് 19 രോഗം പടര്ന്നു പിടിച്ച സാഹചര്യത്തില് സംസ്ഥാനത്തെ വിവിധ ജില്ലകളിലായി 1116 പേര് നിരീക്ഷണത്തിലാണ്. ഇവരില് 967 പേര് വീടുകളിലും 149 പേര് ആശുപത്രികളിലും നിരീക്ഷണത്തിലാണ്. സംശയാസ്പദമായവരുടെ 807 സാമ്പിളുകള് എന്. ഐ.വി യില് പരിശോധനയ്ക്ക് അയച്ചിട്ടുണ്ട്. ഇതില് 717 സാമ്പിളുകളുടെ പരിശോധനാ ഫലം നെഗറ്റിവ് ആണ്. ബാക്കിയുള്ള പരിശോധനാഫലം വരാനുണ്ട്. വീട്ടിലെ നിരീക്ഷണത്തില് കഴിയുന്ന 5 വ്യക്തികളെ പരിഷ്കരിച്ച മാര്ഗരേഖ പ്രകാരം ഇന്ന് ഒഴിവാക്കിയിട്ടുണ്ട്.
