പാട്ന: ബോളിവുഡ് താരം സുശാന്ത് സിങ് രജ്പുതിന്റെ മരണത്തില് നടി റിയാ ചക്രബര്ത്തിക്കെതിരെ കേസെടുക്കണമെന്ന് ഹരജി. ബീഹാറിലെ മുസഫര്പുര് കോടതിയിലാണ് ഹരജി നല്കിയിരിക്കുന്നത്.
മുസഫര് പുരിലെ പഠാഹി നിവാസിയായ കുന്ദന് കുമാറാണ് സുശാന്തിന്റെ മരണത്തില് പങ്കുണ്ടെന്നാരോപിച്ച് കൊണ്ട് റിയ ചക്രബര്ത്തിക്കെതിരെ ഹരജി നല്കിയത്.
മാനസികമായും സാമ്പത്തികമായും സുശാന്തിനെ ചൂഷണം ചെയ്തുവെന്നും ഇത് ആത്മഹത്യയിലേക്ക് നയിക്കപ്പെട്ടുവെന്നും അദ്ദേഹം പറഞ്ഞു.
ഐപിസി സെക്ഷന് 306, 420 എന്നീ വകുപ്പുകളും റിയക്കെതിരെ ചുമത്താന് ഹരജിയില് ആവശ്യപ്പെടുന്നു.
സുശാന്തിന്റെ മരണവുമായി ബന്ധപ്പെട്ട് മുംബൈ പൊലീസ് ഒന്പത് മണിക്കൂറോളം റിയയെ ചോദ്യം ചെയ്തിരുന്നു. സുശാന്തുമായി റിയ പ്രണയത്തിലായിരുന്നുവെന്ന് റിയ സമ്മതിച്ചതായി റിപ്പോര്ട്ടുകളുമുണ്ടായിരുന്നു.
ലോക്ഡൗണ് സമയത്ത് റിയ സുശാന്തിനൊപ്പം ഫ്ളാറ്റിലായിരുന്നു താമസിച്ചിരുന്നതെന്നും പരസ്പരം വഴക്കുണ്ടായിരുന്നതിനെത്തുടര്ന്ന് തിരിച്ച് പോവുകയായിരുന്നെന്നും റിയ പൊലീസിനോട് പറഞ്ഞു. അതിന് ശേഷവും ഫോണില് ബന്ധപ്പെട്ടിരുന്നു. 2020 അവസാനത്തോടെ വിവാഹം കഴിക്കാന് തീരുമാനിച്ചിരുന്നു. വീട് വാങ്ങുന്നതിനെക്കുറിച്ചും ആലോചനകളുണ്ടായിരുന്നെന്ന് റിയ പൊലീസിന് മൊഴി നല്കി.
മരിക്കുന്നതിന് മുമ്പ് ശനിയാഴ്ച രാത്രി സുശാന്ത് റിയയെ ഫോണില് വിളിച്ചിരുന്നു. റിയയുടെ ഫോണ് വിവരങ്ങളും സന്ദേശങ്ങളും പൊലീസ് ശേഖരിച്ചു.
സുശാന്ത് വിഷാദ രോഗത്തിന് ചികിത്സ തേടിയിരുന്നെന്നും റിയ പൊലീസിനോട് പറഞ്ഞു. മരുന്ന് കഴിക്കാതെ ജീവിത ശൈലി ക്രമീകരിക്കാനാണ് സുശാന്ത് ശ്രമിച്ചിരുന്നത്. ഇതിനായി യോഗയും ധ്യാനവും ചെയ്തിരുന്നു. മരുന്ന് കഴിക്കാന് തയ്യാറായില്ലെന്നും റിയ പറഞ്ഞു.
ജൂണ് 15ന് ഉച്ചയ്ക്കാണ് സുശാന്തിനെ ബാന്ദ്രയിലെ അപ്പാര്ട്ട്മെന്റില് മരിച്ച നിലയില് കണ്ടെത്തിയത്.
