ന്യൂഡല്ഹി: ആരോഗ്യമേഖലയുടെ വികസനം ലക്ഷ്യമിട്ട് കേന്ദ്രസര്ക്കാര് മുന്നോട്ടുവെച്ച 64000 കോടി രൂപയുടെ ആത്മനിര്ഭര് സ്വസ്ഥ് ഭാരത് പദ്ധതിക്ക് കേന്ദ്രമന്ത്രിസഭയുടെ അംഗീകാരം. കഴിഞ്ഞ കേന്ദ്രബജറ്റില് പദ്ധതിക്കായി 64,180 കോടി നീക്കിവെക്കുമെന്ന് ധനമന്ത്രി പ്രഖ്യാപിച്ചിരുന്നു. ആറ് വര്ഷം കൊണ്ട് പ്രാഥമിക ആരോഗ്യമേഖല മുതല് എല്ലാ മേഖലകളുടേയും സമ്പൂര്ണമായ വികസനമാണ് പദ്ധതിയിലൂടെ ലക്ഷ്യമിടുന്നത്. അടിസ്ഥാന ആരോഗ്യ സൗകര്യങ്ങള് മുതല് പരിശോധന, ചികിത്സ, മരുന്ന്, ഗവേഷണം തുടങ്ങി ആരോഗ്യമേഖലയുടെ സമഗ്രമായ വികസനമാണ് പദ്ധതി ആസൂത്രണം ചെയ്തിരിക്കുന്നത്.
പദ്ധതിയില് രാജ്യത്തെ എല്ലാ ജില്ലകളിലും 3382 ബ്ലോക്കുകളിലും സംയോജിത പരിശോധന ലാബുകള് സജ്ജീകരിക്കും. ദേശീയ ആരോഗ്യ ദൗത്യത്തിന് പുറമേയാണ് പ്രധാനമന്ത്രി ആത്മനിര്ഭര് സ്വസ്ഥ് ഭാരത് യോജനയും നടപ്പിലാക്കുന്നത്.
