സാന്‍മാര്‍ക്കസ് (ടെക്‌സസ്): ടെക്‌സസ് സംസ്ഥാന യൂണിവേഴ്‌സിറ്റി ഫുട്‌ബോള്‍ പ്ലെയര്‍ കംബ്രെയ്ല്‍ വിന്റേഴ്‌സ് (20) വെടിയേറ്റ് കൊല്ലപ്പെട്ട കേസില്‍ നലിസാ ബ്രിയാന (20), ടൈറീക്ക് ഫിയാചൊ (20) എന്നിവരെ സാന്‍മാര്‍ക്കസ് പോലീസ് അറസ്റ്റു ചെയ്തു. സാന്‍മാര്‍ക്കസ് അക്വറീന സ്പ്രിംഗ് ഡ്രൈവില്‍ സ്ഥിതി ചെയ്യുന്ന ലോഡ്ജ് അപ്പാര്‍ട്ട്‌മെന്റിന് മുമ്പില്‍ നവംബര്‍ 25 ചൊവ്വാഴ്ച വൈകിട്ടായിരുന്നു സംഭവം. മയക്കുമരുന്ന് കച്ചവടവുമായി ബന്ധപ്പെട്ടാണ് വെടിവെപ്പുണ്ടായതെന്ന് പോലീസ് പറഞ്ഞു.
സംഭവത്തെ കുറിച്ചു വിവരം ലഭിച്ചയുടന്‍ എത്തിയ പൊലീസ്, നെഞ്ചില്‍ വെടിയേറ്റു കിടക്കുന്ന വിന്റേഴ്‌സിന് പ്രഥമ ചികിത്സ നല്‍കിയെങ്കിലും ജീവന്‍ രക്ഷിക്കാനായില്ല. സംഭവ സ്ഥലത്തുവെച്ചു തന്നെ മരണം സംഭവിച്ചു. ടെക്‌സസ് സ്റ്റേറ്റ് യൂണിവേഴ്‌സിറ്റി സൊഫമൂറായിരുന്നു വിന്റേഴ്‌സ്. ടീമില്‍ ഡിഫന്‍സീവ് ബാക്കായിരുന്നുവെന്ന് കോച്ച് ജേക്ക് സ്വവിറ്റല്‍ പറഞ്ഞു.
ഹൂസ്റ്റണില്‍ നിന്നുളള്ള വിന്റേഴ്‌സ് അലീഫ് ടെയ്‌ലര്‍ ഹൈസ്കൂളില്‍ നിന്നാണ് ഗ്രാജുവേറ്റ് ചെയ്തത്. ഭാവിയിലെ നല്ലൊരു ഫുട്‌ബോള്‍ താരത്തെയാണ് നഷ്ടമായതെന്ന് യൂണിവേഴ്‌സിറ്റി കോച്ച് പറഞ്ഞു. യൂണിവേഴ്‌സിറ്റി അധികൃതരും വിന്റേഴ്‌സിന്റെ ആകസ്മിക വിയോഗത്തില്‍ അനുശോചിച്ചു. അനിതരസാധാരണമായ അത്‌ലറ്റിക് കഴിവുള്ള യുവാവായിരുന്നു വിന്റേഴ്‌സെന്നും യൂണിവേഴ്‌സിറ്റി സന്ദേശത്തില്‍ ചൂണ്ടിക്കാട്ടി.
