യുഎസ്, റൊമാനിയ, യുകെ എന്നിവിടങ്ങളിൽ പ്രത്യക്ഷപ്പെട്ടതിന് സമാനമായ രണ്ട് നിഗൂഢ ലോഹത്തൂണുകൾ ഇപ്പോൾ പോളണ്ടിലും പ്രത്യക്ഷപ്പെട്ടിരിക്കുന്നു. പോളണ്ടിൽ ആദ്യത്തെ ലോഹത്തൂൺ പ്രത്യക്ഷപ്പെട്ടത് കെൽസിയിലെ ദക്ഷിണ മേഖലയിലാണ്. രണ്ടാമത്തെ ലോഹത്തൂൺ പ്രത്യക്ഷപ്പെട്ടത് വാർസോയിലെ വിസ്തുല നദീ തീരത്താണ്.
ഇതുവരെ ഒൻപത് രാജ്യങ്ങളിലാണ് ലോഹത്തൂണുകൾ പ്രത്യക്ഷപ്പെട്ടത്. ഒൻപത് അടി ഉയരത്തിൽ നിൽക്കുന്ന കെൽസിയിലെ ലോഹത്തൂൺ ബുധനാഴ്ച രാവിലെ സൈറ്റിലെ ഒരു ഉദ്യോഗസ്ഥൻ കണ്ടെത്തി. അതെ ദിവസം ഉച്ചയ്ക്ക് തന്നെയാണ് വിസ്തുല നദിക്കരയിലും ലോഹത്തൂൺ കണ്ടെത്തുന്നത്.
നവംബർ പകുതിയോടെയാണ് ലോകത്തിന്റെ വിവിധ ഭാഗങ്ങളിലായി തിളങ്ങുന്ന ലോഹത്തൂണുകൾ പൊങ്ങി തുടങ്ങിയത്. ആദ്യം പ്രത്യക്ഷപ്പെട്ടത് യൂടായിലായിരുന്നു. ഹെലികോപ്റ്ററിൽ ആടുകളെ നോക്കിയിറങ്ങിയവരാണ് യൂടായിൽ നിഗൂഢമായ ലോഹത്തൂൺ കണ്ടെത്തിയത്. രണ്ട് ദിവസങ്ങൾക്കു ശേഷം യൂടായിൽ നിന്ന് ലോഹത്തൂൺ അപ്രത്യക്ഷമാവുകയും ചെയ്തു.
