റിയാദ്: കൊവിഡ് രോഗലക്ഷണങ്ങള്‍ പ്രകടിപ്പിക്കുന്നവരുടെ പരിശോധനയ്ക്കായി സൗദി അറേബ്യയില്‍ പ്രത്യേക ആശുപത്രികള്‍ തുടങ്ങുന്നു. ടാറ്റാമന്‍ എന്ന പേരിലാണ് ക്ലിനിക്കുകള്‍ തുടങ്ങുന്നത്. സൗദി ആരോഗ്യമന്ത്രാലയമാണ് ഇക്കാര്യം അറിയിച്ചത്.
മുഴുവന്‍ സമയവും ഈ ആശുപത്രികള്‍ പ്രവര്‍ത്തിക്കും. സൗദി പൗരന്‍മാര്‍ക്കു പുറമെ രാജ്യത്തെ വിദേശികള്‍ക്കും ഈ ആശുപത്രി സൗകര്യം ലഭ്യമാവും. ഇതിന് നേരത്തെ ബുക്ക് ചെയ്യേണ്ട ആവശ്യമില്ല. കൊവിഡ് പ്രതിസന്ധി കാര്യമായി ബാധിച്ച മക്കയില്‍ നിലവില്‍ ഇത്തരത്തില്‍ അഞ്ച് ക്ലിനിക്കുകള്‍ പ്രവര്‍ത്തിക്കുന്നുണ്ട്.
രാജ്യമൊട്ടാകെ ഇത്തരത്തില്‍ ക്ലിനിക്കുകള്‍ സ്ഥാപിക്കാനാവുമെന്ന് പ്രതീക്ഷിക്കുന്നതായി സൗദി ആരോഗ്യമന്ത്രാലയം അറിയിച്ചു. 98,868 പേര്‍ക്കാണ് സൗദി അറേബ്യയില്‍ കൊവിഡ് സ്ഥിരീകരിച്ചത്. 71,791 പേര്‍ രോഗവിമുക്തി നേടുകയും 676 പേര്‍ മരണപ്പെടുകയും ചെയ്തു.
