ബാങ്ക് ഹോളിഡേ വാരാന്ത്യത്തോടനുബന്ധിച്ച് ഗാർഡ നടത്തിയ പ്രത്യേക റോഡ് സുരക്ഷാ പരിശോധനയിൽ ഇതുവരെ മദ്യമോ മയക്കുമരുന്നോ ഉപയോഗിച്ച് വാഹനമോടിച്ചെന്ന സംശയത്തിൽ 121 ഡ്രൈവർമാരെ അറസ്റ്റ് ചെയ്തു. വ്യാഴാഴ്ച രാവിലെ ആരംഭിച്ച പ്രത്യേക റോഡ് പൊലീസിംഗ് ഓപ്പറേഷൻ ചൊവ്വാഴ്ച രാവിലെ വരെ തുടരും.
Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2
ഗാർഡ സൂപ്രണ്ടന്റ് ലിയം ജെറാഘ്റ്റിയുടെ നേതൃത്വത്തിൽ നടക്കുന്ന പരിശോധനയിൽ നിരവധി ഗുരുതര നിയമലംഘനങ്ങളും കണ്ടെത്തി. 120 കിലോമീറ്റർ വേഗപരിധിയുള്ള റോഡിൽ ഒരു വാഹനം 172 കിലോമീറ്റർ വേഗത്തിൽ സഞ്ചരിച്ചതായും, ഡബ്ലിനിലെ ക്ലോണ്ടാർഫിൽ 50 കിലോമീറ്റർ പരിധിയുള്ള റോഡിൽ മറ്റൊരു വാഹനം 115 കിലോമീറ്റർ വേഗത്തിൽ ഓടിച്ചതായും കണ്ടെത്തി. കൂടാതെ കൗണ്ടി ക്ലെയറിലെ പാർട്ടീനിൽ 60 കിലോമീറ്റർ പരിധിയുള്ള റോഡിൽ ഒരു വാഹനം 101 കിലോമീറ്റർ വേഗത്തിൽ സഞ്ചരിച്ചതും രേഖപ്പെടുത്തി.
ബാങ്ക് ഹോളിഡേ വാരാന്ത്യങ്ങളിൽ റോഡുകളിൽ വാഹനങ്ങളുടെ തിരക്ക് വർധിക്കുന്നതിനാൽ അപകടസാധ്യതയും ഉയരുന്നതായി ഗാർഡ അറിയിച്ചു. കഴിഞ്ഞ ദിവസം നടന്ന രണ്ട് മാരക റോഡപകടങ്ങളിൽ കാർലോയിലെ ലീലിൻബ്രിഡ്ജിൽ 40-കളിലുള്ള ഒരു മോട്ടോർസൈക്കിൾ യാത്രികനും, ഡൊണിഗാളിലെ പെറ്റിഗോയിൽ 20-കളിലുള്ള ഒരു യുവാവും മരിച്ചു. പ്രത്യേക പരിശോധനയിൽ ഇതുവരെ 2,700-ലധികം ഡ്രൈവർമാർ അമിതവേഗത്തിൽ വാഹനമോടിച്ചതായി കണ്ടെത്തി. കൂടാതെ 310 പേർ മൊബൈൽ ഫോൺ ഉപയോഗിച്ചോ സീറ്റ് ബെൽറ്റ് ധരിക്കാതെയോ വാഹനമോടിച്ചതിനും പിടിയിലായി.
ഈ വർഷം ജനുവരി മുതൽ ജൂൺ അവസാനം വരെ അമിതവേഗത്തിന് 1,19,000-ത്തിലധികം ഫിക്സ്ഡ് ചാർജ് നോട്ടീസുകളും, വാഹനം ഓടിക്കുമ്പോൾ മൊബൈൽ ഫോൺ ഉപയോഗിച്ചതിന് 14,500-ലധികം നോട്ടീസുകളും, സീറ്റ് ബെൽറ്റ് ധരിക്കാത്തതിന് 3,000-ത്തിലധികം നോട്ടീസുകളും ഗാർഡ പുറപ്പെടുവിച്ചു. ഇൻഷുറൻസ്, ഡ്രൈവിംഗ് ലൈസൻസ്, NCT/CVRT എന്നിവ ഇല്ലാതെയോ, ഒറ്റയ്ക്ക് വാഹനം ഓടിച്ച ലേണർ ഡ്രൈവർമാരുടേയോ 18,000-ത്തിലധികം വാഹനങ്ങൾ ഈ വർഷം പിടിച്ചെടുത്തു.
ഗാർഡയുടെ കണക്കുകൾ പ്രകാരം ഈ വർഷം ഇതുവരെ അയർലണ്ടിലെ റോഡപകടങ്ങളിൽ 110 പേർ മരണപ്പെട്ടു. ബാങ്ക് ഹോളിഡേ യാത്രകൾ നടത്തുന്നവർ വേഗപരിധി പാലിക്കണമെന്നും, മദ്യമോ മയക്കുമരുന്നോ ഉപയോഗിച്ച് വാഹനമോടിക്കരുതെന്നും, മൊബൈൽ ഫോൺ ഉപയോഗം ഒഴിവാക്കി സീറ്റ് ബെൽറ്റ് നിർബന്ധമായും ധരിക്കണമെന്നും ഗാർഡ വീണ്ടും അഭ്യർഥിച്ചു.
Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S
Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==
