പൗരത്വത്തിന് എട്ട് വർഷത്തെ താമസം, ഭാഷാ പരീക്ഷ, സാമ്പത്തിക സ്വയംപര്യാപ്തത എന്നിവ നിർബന്ധമാക്കാൻ നീക്കം
അയർലണ്ടിൽ പൗരത്വം നേടുന്നതിനുള്ള നിയമങ്ങൾ കൂടുതൽ കർശനമാക്കാൻ സർക്കാർ. “പൗരത്വം ഒരു അവകാശമല്ല, ആനുകൂല്യമാണ്” എന്ന് നീതിന്യായ മന്ത്രി ജിം ഒ’കല്ലഗൻ വ്യക്തമാക്കി. നിലവിൽ അഞ്ച് വർഷത്തെ താമസം മതിയാകുന്നിടത്ത്, പുതിയ നിർദേശങ്ങൾ പ്രാബല്യത്തിൽ വന്നാൽ ഐറിഷ് പൗരത്വത്തിന് അപേക്ഷിക്കുന്നവർ രാജ്യത്ത് കുറഞ്ഞത് എട്ട് വർഷം താമസിച്ചിരിക്കണം. കൂടാതെ ഇംഗ്ലീഷിലോ ഐറിഷിലോ ഭാഷാ പരിജ്ഞാനം തെളിയിക്കുന്ന പരീക്ഷയും സാമ്പത്തികമായി സ്വയംപര്യാപ്തരാണെന്ന് തെളിയിക്കുന്നതിനുള്ള വ്യവസ്ഥകളും ഏർപ്പെടുത്തും.
Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2
ഐറിഷ് പൗരത്വം നേടുന്ന കുടിയേറ്റക്കാരുടെ എണ്ണം സമീപ വർഷങ്ങളിൽ ഗണ്യമായി വർധിച്ചതാണ് നിയമങ്ങളിൽ മാറ്റം വരുത്താനുള്ള കാരണങ്ങളിലൊന്നെന്ന് മന്ത്രി പറഞ്ഞു. കഴിഞ്ഞ വർഷം 25,000 പേർക്ക് പുതിയതായി ഐറിഷ് പൗരത്വം ലഭിച്ചതും അദ്ദേഹം ചൂണ്ടിക്കാട്ടി. യൂറോപ്യൻ യൂണിയനിലെ മറ്റ് രാജ്യങ്ങളിലെ സംവിധാനങ്ങളുമായി അയർലണ്ടിനെ കൂടുതൽ അടുപ്പിക്കുന്നതാണ് നിർദേശങ്ങളെന്ന് Taoiseach മൈക്കൽ മാർട്ടിനും വ്യക്തമാക്കി. കുടിയേറ്റവും പൗരത്വവും സംബന്ധിച്ച് സ്വയംപര്യാപ്തതയും സ്വാതന്ത്ര്യവും ഉറപ്പാക്കുന്നതിനൊപ്പം ആവശ്യമായ സന്തുലിതാവസ്ഥ നിലനിർത്തുകയാണ് സർക്കാരിന്റെ ലക്ഷ്യമെന്നും അദ്ദേഹം പറഞ്ഞു.
Temporary Protection Directive പ്രകാരം അയർലണ്ടിൽ താമസിച്ച കാലയളവ് പുതിയ എട്ട് വർഷത്തെ പൗരത്വ യോഗ്യതാ കാലയളവിൽ ഉൾപ്പെടുത്തില്ലെന്ന് മന്ത്രി സ്ഥിരീകരിച്ചു. യുക്രെയ്ൻ സ്വദേശികൾക്ക് താൽക്കാലിക സംരക്ഷണത്തിന്റെ ഭാഗമായി അയർലണ്ടിൽ കഴിഞ്ഞ വർഷങ്ങൾ മാത്രം അടിസ്ഥാനമാക്കി പൗരത്വത്തിന് അർഹത ലഭിക്കുന്നത് Temporary Protection സംവിധാനത്തിന്റെ ഉദ്ദേശ്യത്തെ തന്നെ ദുർബലപ്പെടുത്തുമെന്നാണ് മന്ത്രിയുടെ നിലപാട്.
പൗരത്വത്തിന് അപേക്ഷിക്കുന്നവർ രാജ്യത്തിന് സാമ്പത്തിക ബാധ്യതയാകാത്തവരാണെന്ന് തെളിയിക്കേണ്ടിവരും. അപേക്ഷ സമർപ്പിക്കുന്നതിന് മുമ്പുള്ള നിർദ്ദിഷ്ട കാലയളവിൽ ചില സാമൂഹിക ക്ഷേമ ആനുകൂല്യങ്ങൾ സ്വീകരിച്ചിട്ടില്ലെന്ന നിബന്ധനയും കൊണ്ടുവരാൻ സർക്കാർ ഉദ്ദേശിക്കുന്നു. കൂടാതെ, ഇമിഗ്രേഷൻ നിയമങ്ങൾ ലംഘിച്ചവർക്ക് പൗരത്വം നിഷേധിക്കാൻ വ്യക്തമായ വ്യവസ്ഥയും പുതിയ നിയമത്തിൽ ഉൾപ്പെടുത്തും.
പൊതു ക്രമത്തിനോ ദേശീയ സുരക്ഷയ്ക്കോ ഭീഷണിയാകുന്ന സാഹചര്യങ്ങളിൽ പൗരത്വം റദ്ദാക്കുന്നതിനുള്ള മന്ത്രിയുടെ അധികാരവും കൂടുതൽ വ്യക്തമായി നിർവചിക്കും. റദ്ദാക്കൽ നടപടികൾ വേഗത്തിലാക്കുന്നതിനുള്ള പ്രത്യേക സംവിധാനവും കൊണ്ടുവരും. ഐറിഷ് പൗരന്മാരുടെ വിദേശ പങ്കാളികൾക്കും നിലവിലെതിനേക്കാൾ കൂടുതൽ കാലം അയർലണ്ടിൽ താമസിച്ച ശേഷമേ പൗരത്വത്തിന് അപേക്ഷിക്കാൻ കഴിയൂ.
പുതിയ നിർദേശങ്ങൾ അയർലണ്ടിന്റെ പൗരത്വ നിയമങ്ങളിൽ ഒരു തലമുറയ്ക്കിടയിലെ ഏറ്റവും വലിയ പരിഷ്കരണമാണെന്ന് ജിം ഒ’കല്ലഗൻ പറഞ്ഞു. Irish Nationality and Citizenship (Amendment) Bill 2026 ബുധനാഴ്ച മന്ത്രിസഭയുടെ പരിഗണനയ്ക്ക് കൊണ്ടുവരും. അഞ്ചിൽ നിന്ന് എട്ട് വർഷമായി താമസ നിബന്ധന ഉയർത്താനുള്ള നീക്കം പിൻവലിക്കണമെന്ന് ലേബർ പാർട്ടിയുടെ നീതിന്യായ വക്താവ് അലൻ കെല്ലി ആവശ്യപ്പെട്ടു.
അയർലണ്ടിൽ വർഷങ്ങളായി താമസിക്കുകയും ജോലി ചെയ്യുകയും നികുതി അടയ്ക്കുകയും കുടുംബത്തെ വളർത്തുകയും സമൂഹത്തിന് സംഭാവന നൽകുകയും ചെയ്യുന്നവർക്ക് പൗരത്വത്തിലേക്ക് വ്യക്തവും ന്യായവുമായ മാർഗം വേണമെന്നും അദ്ദേഹം പറഞ്ഞു. എട്ട് വർഷത്തെ കാത്തിരിപ്പ് എന്ത് പ്രശ്നമാണ് പരിഹരിക്കുന്നതെന്ന് മന്ത്രി വ്യക്തമാക്കണമെന്നും, നിർദേശം കുടിയേറ്റ സംവിധാനം മെച്ചപ്പെടുത്തുന്നതിനേക്കാൾ രാഷ്ട്രീയ നിലപാട് പ്രകടിപ്പിക്കാനുള്ള ശ്രമമായി തോന്നുന്നുവെന്നും കെല്ലി വിമർശിച്ചു.
ഇമിഗ്രേഷൻ പിന്തുണാ സംഘടനയായ Doras-ും നിർദേശത്തിനെതിരെ രംഗത്തെത്തി. പുതിയ മാറ്റങ്ങൾക്ക് പ്രായോഗികമായ പ്രയോജനം ഇല്ലെന്നും നിലവിൽ തന്നെ ഐറിഷ് പൗരത്വം നേടുന്നത് വളരെ ബുദ്ധിമുട്ടാണെന്നും സംഘടനയുടെ CEO ജോൺ ലാനൻ പറഞ്ഞു. അപേക്ഷകൾ അംഗീകരിക്കാൻ വർഷങ്ങളോളം കാത്തിരിക്കേണ്ടിവരുന്നവരും, രാജ്യത്തിന് പുറത്തു ചെലവഴിച്ച സമയത്തിന്റെ പേരിൽ അപേക്ഷ നിരസിക്കപ്പെടുന്നവരും ഉണ്ടെന്ന് അദ്ദേഹം പറഞ്ഞു.
ഭാഷാ പരീക്ഷ കൊണ്ടുവരുകയാണെങ്കിൽ എല്ലാവർക്കും മതിയായ ഇംഗ്ലീഷ്, ഐറിഷ് ഭാഷാ ക്ലാസുകൾ ലഭ്യമാക്കാൻ സർക്കാർ നിക്ഷേപം നടത്തണമെന്നും Doras ആവശ്യപ്പെട്ടു. ഭാഷാ പരിജ്ഞാനം സമൂഹവുമായി കുടിയേറ്റക്കാർക്ക് കൂടുതൽ ഫലപ്രദമായി സംയോജിക്കാൻ പ്രധാനമാണെന്നും ലാനൻ ചൂണ്ടിക്കാട്ടി. പൗരത്വം ലഭിക്കാത്തവർക്ക് തുടർന്നും ഇമിഗ്രേഷൻ അനുമതി പുതുക്കേണ്ടിവരും. ഓരോ തവണയും 300 യൂറോ വരെ ചെലവാകുന്ന ഈ നടപടിക്രമം കുടിയേറ്റക്കാരുടെ താമസസ്ഥിതിയിൽ അനിശ്ചിതത്വം സൃഷ്ടിക്കുന്നുവെന്നും Doras വ്യക്തമാക്കി.
Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S
Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==
