ബെംഗളൂരു: ബെംഗളൂരുവിലെ ഡിസിപി വെസ്റ്റ് സോണിൽ വ്യാഴാഴ്ച രാത്രി നിരവധി കാറുകൾ തല്ലിത്തകർത്ത കേസിൽ 27കാരനായ യുവാവ് അറസ്റ്റിൽ. കാമുകിയുമായി വേർപിരിഞ്ഞതിന്റെ ദേഷ്യത്തിൽ റോഡരികിൽ നിർത്തിയിട്ട കാറുകൾ യുവാവ് തല്ലിത്തകർക്കുകയായിരുന്നുവെന്ന് പോലീസ് പറഞ്ഞു. പ്രദേശത്തെ സിസിടിവി ദൃശ്യങ്ങളിൽ നിന്ന് തിരിച്ചറിഞ്ഞ പ്രതിയെ വെള്ളിയാഴ്ച രാവിലെയാണ് പോലീസ് അറസ്റ്റ് ചെയ്തത്.
കാമുകിയുമായുള്ള ബന്ധം വേർപിരിഞ്ഞതിന്റെ സങ്കടത്തിലും ദേഷ്യത്തിലുമാണ് താൻ കാറുകൾ തല്ലിത്തർത്തതെന്ന് ചോദ്യംചെയ്യലിനിടെ പ്രതി പോലീസിനോട് പറഞ്ഞു. സമാനമായ രീതിയിൽ ഇക്കഴിഞ്ഞ മാർച്ചിൽ ദക്ഷിണ ബെംഗളൂരുവിൽ മദ്യപിച്ചെത്തിയ രണ്ട് യുവാക്കൾ 20 കാരനെ മർദ്ദിക്കുകയും സമീപമുള്ള 15 ഓളം കാറുകളും ബൈക്കുകളും തല്ലിത്തകർക്കുകയും ചെയ്തിരുന്നു.