സഹ്യൻ ചാഞ്ഞിറങ്ങി, അറബിക്കടലലകൾക്കു കളിമുറ്റം ഒരുക്കുന്ന മലയാള മണ്ണിൽ, പണ്ടെങ്ങോ ഐശ്വര്യപ്രതാഭത്തോടെ നാടുവാണിരുന്ന മന്നൻ മഹാബലിയുടെ സൽഭരണത്തിന്റെ നല്ലനാളുകൾ മലയാള മുറ്റത്തണയുമ്പോൾ, കേളിയും നന്മയുടെ തൂശനിലയിൽ, തുമ്പപ്പൂചോറു വിളമ്പി, സ്നേഹസമ്പന്നതയുടെ കറികൾ കൂട്ടിക്കുഴച്ച്, ഉദയചക്രവാളത്തോളം ഉയരുന്ന സമത്വസുന്ദര ഭാസുരഭാവിയെന്ന പാൽപ്പായസ മധുരമായ ഓണസംസ്കാരത്തെ കെങ്കേമമായി ഈ വർഷവും കൊണ്ടാടുന്നു. ഉദരത്തിന്റെ വിശപ്പകറ്റാൻ, പ്രവാസി കുപ്പായം എടുത്തണിഞ്ഞ മലയാളിയുടെ, ഹൃദയ വിശപ്പിന്റെ ആഘോഷമായി മറുനാട്ടിൽ ഒരോ മലയാളിയും കൊണ്ടാടുന്ന ഓണാഘോഷം ഇത്തവണ കേളി ഒരുക്കുന്നത് 2022 സെപ്റ്റംബർ പത്തിനാണ്. വർണ്ണാഭമായ കലാസാംസ്കാരിക പരിപാടികൾക്കൊപ്പം നിലാവും മായുന്നു, ജീവാംശമായി, പവിഴമഴയെ, നീ ഹിമമഴയായി തുടങ്ങിയ വീണ്ടും വീണ്ടും കേൾക്കാൻ കൊതിക്കുന്ന ശ്രവണസുന്ദരമായ നിരവധി ഗാനങ്ങൾ ആലപിച്ച് മലയാളികളുടെ മനം കവർന്ന യുവഗായകൻ Dr. K.S. ഹരിശങ്കർ നയിക്കുന്ന പ്രഗതി ബാൻഡ് സെപ്റ്റബർ പത്തിന് കേളി പൊന്നോണനാളിൽ സ്വിറ്റ്സർലാൻഡിൽ സംഗീത മഴയായ് പെയ്തിറങ്ങുന്നു.
സംഗീതപ്രേമികൾ നെഞ്ചിലേറ്റിയ അനശ്വര ഗാനങ്ങൾക്കൊപ്പം പുതിയ തലമുറയിലെ ഗാനങ്ങളും കോർത്തിണക്കി ജനഹൃദങ്ങളെ ത്രസിപ്പിക്കുന്ന സംഗീത മാസ്മരികതയുടെ നവ്യാനുഭൂതിയിലേയ്ക്കും, ഉത്സവങ്ങളിലൂടെ ഊഷ്മളമാകുന്ന ബന്ധങ്ങളുടെ സ്നേഹമന്ത്രണമായ ഓണസദ്യയിലേയ്ക്കും സകലരേയും സന്തോഷപൂർവ്വം സെപ്റ്റംബർ പത്തിന് കുസ്നാഹ്റ്റിലെ ഹെസ്ലി ഹാളിലേയ്ക്ക് കേളി ഹാർദ്ദമായി ക്ഷണിക്കുന്നു.