ഓസ്ട്രേലിയൻ ആഭ്യന്തരമന്ത്രി പീറ്റർ ഡറ്റനും കോവിഡ് ബാധ സ്ഥിരീകരിച്ചു. വെള്ളിയാഴ്ച ഉച്ചയോടെയാണ് ആഭ്യന്തര മന്ത്രി പീറ്റർ ഡറ്റന് വൈറസ് ബാധ സ്ഥിരീകരിച്ചത്. “രാവിലെ പനിയും തൊണ്ടവേദനയുമായാണ് ഉണർന്നെഴുന്നേറ്റത്” -പീറ്റർ ഡറ്റൻ പ്രസ്താവനയിൽ അറിയിച്ചു. ഉടൻ തന്നെ ക്വീൻസ്ലാന്റ് ആരോഗ്യവകുപ്പിനെ ബന്ധപ്പെട്ടതായും കൊവിഡ്-19 പരിശോധന നടത്തിയതായും അദ്ദേഹം പറഞ്ഞു. അദ്ദേഹത്തിന് രോഗബാധയുള്ളതായി ഉച്ചയോടെ ആരോഗ്യവകുപ്പ് സ്ഥിരീകരിച്ചു. ഇതേത്തുടർന്ന് അദ്ദേഹത്തെ ആശുപത്രിയിൽ പ്രവേശിപ്പിച്ചു.
അടുത്തിടെ പീറ്റർ ഡറ്റൻ അമേരിക്കിയലേക്ക് യാത്ര ചെയ്തിരുന്നു. ക്വീൻസ്ലാന്റിൽ വൈറസ് ബാധ സ്ഥിരീകരിക്കുന്ന 35ാമത്തെ വ്യക്തിയാണ് പീറ്റർ ഡറ്റൻ. പ്രധാനമന്ത്രി അധ്യക്ഷനായ ക്യാബിനറ്റ് സുരക്ഷാ സമിതി യോഗത്തിൽ ഈയാഴ്ച ആദ്യം പീറ്റർ ഡറ്റൻ പങ്കെടുക്കുകയും ചെയ്തിരുന്നു. നേരത്തേ ബ്രിട്ടീഷ് ആരോഗ്യമന്ത്രിക്ക് കൊറോണബാധ സ്ഥിരീകരിച്ചിരുന്നു. കനേഡിയൻ പ്രധാനമന്ത്രി ജസ്റ്റിൻ ട്രൂഡോയുടെ ഭാര്യയ്ക്കും വൈറസ് ബാധ സ്ഥിരീകരിച്ചിട്ടുണ്ട്.
