കാബൂള്: താലിബാന് അഫ്ഗാന് തലസ്ഥാനമായ കാബൂളില് പ്രവേശിച്ച സാഹചര്യത്തില് അധികാരകൈമാറ്റം ഉടനുണ്ടായേക്കുമെന്നും അഫ്ഗാന് പ്രസിഡന്റ് അഷ്റഫ് ഗനി രാജിവെക്കുമെന്നും അന്താരാഷ്ട്ര മാധ്യമങ്ങള്. അഫ്ഗാന് മുന് ആഭ്യന്തരമന്ത്രി അലി അഹമ്മദ് ജലാലി ഇടക്കാല സര്ക്കാര് പ്രസിഡന്റ് ആവുമെന്നാണ് സൂചനകള്.
അധികാര കൈമാറ്റം സമാധാനപരമായിരിക്കുമെന്ന് അഫ്ഗാന് ആഭ്യന്തരമന്ത്രി അബ്ദുള് സത്താര് മിര്സാക്ക്വല് പറഞ്ഞു. അഫ്ഗാനിസ്ഥാനിലെ ജനങ്ങള് പരിഭ്രാന്തരാവരുതെന്നും കാബൂള് നഗരത്തില് ആക്രമണങ്ങള് നടക്കില്ലെന്നും സമാധാനപരമായി ഇടക്കാല സര്ക്കാരിന് അധികാരം കൈമാറുമെന്നും വീഡിയോ രൂപത്തിൽ പുറത്തുവന്ന സന്ദേശത്തിലൂടെ അദ്ദേഹം അറിയിച്ചു. ബലം പ്രയോഗിച്ച് അധികാരം ഏറ്റെടുക്കില്ലെന്ന് താലിബാന് വക്താക്കളും പ്രതികരിച്ചിട്ടുണ്ട്.
അഫ്ഗാന് വിഷയം ചര്ച്ചചെയ്യാന് യുഎന് രക്ഷാസമിതി ഉടന് യോഗം ചേരുമെന്ന് റഷ്യ വ്യക്തമാക്കി. റഷ്യന് വിദേശകാര്യമന്ത്രി സമീര് കാബുലോവിനെ ഉദ്ധരിച്ച് റഷ്യന് വാര്ത്താ ഏജന്സികളാണ് ഇക്കാര്യം റിപ്പോര്ട്ട് ചെയ്തത്.
