മക്അഫീ ആന്റിവൈറസ് സോഫ്റ്റ്വെയറിന്റെ ക്രിയേറ്റർ ജോൺ മക്അഫി(75 )യെ ബാഴ്സലോണയ്ക്കടുത്തുള്ള ജയിലിലെ സെല്ലിൽ മരിച്ച നിലയിൽ കണ്ടെത്തി. സ്പാനിഷ് കോടതി നികുതി സംബന്ധമായ ക്രിമിനൽ കുറ്റങ്ങൾ നേരിടാൻ അമേരിക്കയിലേക്ക് കൈമാറുന്നതിനെ അനുകൂലിച്ച് പ്രാഥമിക വിധി പുറപ്പെടുവിച്ച് രണ്ട് മണിക്കൂറുകൾക്കുള്ളിൽ ആയിരുന്നു മരണം. സുരക്ഷാ ഉദ്യോഗസ്ഥർ രക്ഷിക്കാൻ ശ്രമിച്ചെങ്കിലും അതിനു കഴിഞ്ഞില്ലെന്നും ജയിലിലെ മെഡിക്കൽ ടീം അദ്ദേഹത്തിന്റെ മരണത്തിന് സാക്ഷ്യം വഹിച്ചുവെന്നും പ്രാദേശിക കറ്റാലൻ സർക്കാരിന്റെ പ്രസ്താവനയിൽ പറയുന്നു.
കൺസൾട്ടൻസി ജോലികൾ ചെയ്യുമ്പോൾ ക്രിപ്റ്റോകറൻസികൾ പ്രൊമോട്ട് ചെയ്തതിലൂടെയും സംഭാഷണ പരിപാടികളിൽ നിന്നും, ജീവിത കഥ ആധാരമാക്കിയ ഡോക്യുമെന്ററി വിൽക്കാനുള്ള അവകാശം നൽകിയതിൽ നിന്നുമെല്ലാം ലഭിച്ച വരുമാനം റിപ്പോർട്ടു ചെയ്യാതെ നികുതി ഒഴിവാക്കി എന്ന് ടെന്നസി പ്രോസിക്യൂട്ടർമാർ കുറ്റം ചുമത്തിയതിനെ തുടർന്നാണ് അദ്ദേഹം ജയിലിലായത്. കഴിഞ്ഞ ഒക്ടോബറിൽ ബാഴ്സലോണയുടെ അന്താരാഷ്ട്ര വിമാനത്താവളത്തിൽ വെച്ചാണ് മക്അഫി അറസ്റ്റിലായത്.