ന്യൂഡല്ഹി: രാജ്യത്ത് കോവിഡ് വാക്സിൻ വിതരണം ഈ മാസം 13 മുതൽ ആരംഭിക്കുമെന്ന് കേന്ദ്ര ആരോഗ്യസെക്രട്ടറി രാജേഷ് ഭൂഷണ് അറിയിച്ചു. ഇതിന് മുന്നോടിയായുള്ള എല്ലാ തയ്യാറെടുപ്പുകളും പൂർത്തിയായെന്ന് അദ്ദേഹം വ്യക്തമാക്കി. വാക്സിൻ സൂക്ഷിക്കാൻ 29,000 കോൾഡ് സ്റ്റോറേജുൾ സജ്ജമാക്കിയതായി കേന്ദ്ര സർക്കാർ അറിയിച്ചിട്ടുണ്ട്.
കൂടാതെ 37 വിതരണ കേന്ദ്രങ്ങളും, മുംബൈ, ചെന്നൈ, കൊൽക്കത്ത എന്നീ പ്രധാന നഗരങ്ങൾ ഉൾപ്പെടെ നാല് പ്രധാന സംഭരണ കേന്ദ്രങ്ങൾ ഒരുക്കിയതായും കേന്ദ്ര സർക്കാർ അറിയിച്ചു. ഒന്നാം ഘട്ടത്തിൽ കോവിഷീൽഡ് വാക്സിനുകളുടെ അഞ്ചു കോടി ഡോസുകളും, ഇതിനൊപ്പം കോവാക്സിന്റെ ഒരു കോടി ഡോസുകളുമാണ് വിതരണത്തിന് സജ്ജമാക്കിയിട്ടുള്ളത്. അതേസമയം കേരളം അഞ്ച് ലക്ഷം ഡോസ് കൊവിഡ് വാക്സിൻ വേണമെന്ന് കേന്ദ്രത്തെ അറിയിച്ചിട്ടുണ്ട്.
