തിരുവനന്തപുരം: കേരളത്തില്‍ കൊറോണ വൈറസ് ബാധ സ്ഥിരീകരിച്ച സാഹചര്യത്തില്‍ ഭയപ്പെടേണ്ട സാഹചര്യമില്ലെന്ന് സംസ്ഥാന ആരോഗ്യ വകുപ്പ് മന്ത്രി കെകെ ശൈലജ.
വൈറസ് നേരിടാന്‍ ആരോഗ്യ വകുപ്പ് സുസജ്ജമാണെന്നും ശൈലജ ടീച്ചര്‍ വ്യക്തമാക്കി. ചൈനയിലെ വുഹാന്‍ സര്‍വകലാശാലയില്‍ നിന്നെത്തിയ വിദ്യാര്‍ഥിനിക്കാണ് കൊറോണ വൈറസ് ബാധ സ്ഥിരീകരിച്ചത്.
തൃശൂര്‍ ജനറല്‍ ഹോസ്പിറ്റലിലെ ഐസോലേഷന്‍ വാര്‍ഡില്‍ നിരീക്ഷണത്തിലുള്ള വിദ്യാര്‍ഥിനിയുടെ ആരോഗ്യ നില തൃപ്തികരമാണ്.
ആശങ്കാജനകമായ അവസ്ഥയിലല്ല വിദ്യാര്‍ഥിനിയെന്ന് കേന്ദ്ര ആരോഗ്യ മന്ത്രാലയവും അറിയിച്ചിരുന്നു. ആദ്യമായാണ് കേരളത്തില്‍ കൊറോണ വൈറസ് ബാധ സ്ഥിരീകരിക്കുന്നത്.
തൃശൂര്‍ മെഡിക്കല്‍ കോളജില്‍ സര്‍വ സജ്ജീകരണങ്ങളോടെ സ്ഥാപിക്കുന്ന ഐസൊലേഷന്‍ വാര്‍ഡിലേക്ക് വിദ്യാര്‍ഥിനിയെ മാറ്റുമെന്നും ഈ കുട്ടിയടക്കം നാലുപേര്‍ ആശുപത്രിയില്‍ നിരീക്ഷണത്തിലാണെന്നും മന്ത്രി വ്യക്തമാക്കി.
അതേസമയ൦ പരിശോധനയ്ക്കായി അയച്ചു കൊടുത്ത 20 പേരുടെ സാമ്പിളുകളില്‍ 15 എണ്ണത്തിന്‍റെ ഫലം നെഗറ്റീവാണെന്നും മന്ത്രി പറഞ്ഞു. ഇതുവരെ 806 പേരാണ് കേരളത്തില്‍ നിരീക്ഷണത്തിലുള്ളത്. 10പേര്‍ ആശുപത്രിയിലും 796 പേര്‍ വീടുകളിലുമാണ് നിരീക്ഷണത്തിലുള്ളത്.
ലോകാരോഗ്യ സംഘടനയുടെ മാനദണ്ഡം അനുസരിച്ച് രോഗ ബാധിതന്റെ പോരോ മറ്റു വിവരങ്ങളോ പുറത്തുവിട്ടിട്ടില്ല. ഇന്ത്യയുടെ അയല്‍രാജ്യങ്ങളായി നേപ്പാളിലും ശ്രീലങ്കയിലും നേരത്തെ രോഗബാധ സ്ഥിരീകരിച്ചിരുന്നു.
