കായംകുളം ചെട്ടികുളങ്ങരയിൽ വയോധികയെ ക്രൂരമായി മര്‍ദിച്ച ഹോം നഴ്സ് അറസ്റ്റില്‍. 78 കാരിയായ ചെട്ടികുളങ്ങര സ്വദേശിനി വിജയമ്മയെയാണ് കട്ടപ്പന സ്വദേശി ചെമ്പനാല്‍ ഫിലോമിന മർദിച്ചത്. ഡൈനിംഗ് ഹാളിൽ വയോധിക മലമൂത്ര വിസർജനം നടത്തിയതിനെ തുടർന്ന് ഹോം നഴ്സ് ഒരു വടി കൊണ്ട് അടിക്കുകയായിരുന്നു.
അടികൊണ്ട് വൃദ്ധയുടെ തുടയെല്ല് പൊട്ടി. വയോധികയ്ക്ക് വീണ് പരിക്കേറ്റുവെന്നാണ് ഫിലോമിന വൃദ്ധയുടെ മക്കളെ അറിയിച്ചത്. എന്നാൽ വൃദ്ധയെ ആശുപത്രിയിൽ എത്തിച്ചപ്പോൾ ആശുപത്രി അധികൃതർ തുടയെല്ല് പൊട്ടിയിട്ടുണ്ടെന്നും വീണുണ്ടായ പരുക്കല്ലെന്നും അറിയിച്ചതിനെ തുടർന്ന് വീട്ടിലെ കാമറ ദൃശ്യങ്ങൾ പരിശോധിക്കുകയായിരുന്നു. അപ്പോഴാണ് വൃദ്ധയെ ഹോം നേഴ്സ് അടിക്കുന്ന ദൃശ്യങ്ങൾ കണ്ടത്. വടികൊണ്ട് അടിക്കുന്നതും കുത്തുന്നതും സിസിടിവി ദൃശ്യങ്ങളില്‍ വ്യക്തമായിരുന്നു. ഫെബ്രുവരി 20 നാണ് സംഭവം നടന്നത്.
