ജിദ്ദ: സൗദിയിൽ കൊറോണയിൽ നിന്ന് മുക്തരായവരുടെ എണ്ണം ഇന്നും രോഗ ബാധിതരേക്കാൾ കൂടുതൽ. കഴിഞ്ഞ 24 മണിക്കൂറിനുള്ളിൽ മാത്രം 1439 പേരാണു രോഗമുക്തി നേടിയത്. അതേ സമയം പുതുതായി 1257 പേർക്ക് മാത്രമാണു രോഗം സ്ഥിരീകരിച്ചത്. ഇതോടെ സൗദിയിൽ ആകെ കൊറോണ ബാധിച്ചവരുടെ എണ്ണം 2,89,947 ആയി. ഇതിൽ 2,53,478 പേരും രോഗമുക്തരായിട്ടുണ്ട്.
കഴിഞ്ഞ 24 മണിക്കൂറിനുള്ളിൽ 32 കൊറോണ മരണം കൂടി റിപ്പോർട്ട് ചെയ്തതോടെ സൗദിയിലെ ആകെ കൊറോണ മരണം 3199 ആയിട്ടുണ്ട്. നിലവിൽ 33,270 കേസുകളാണു ആക്റ്റീവ് ആയിട്ടുള്ളത്. അതിൽ 1824 പേർ ഗുരുതരാവസ്ഥയിലാണുള്ളത്. ആക്റ്റീവ് കേസുകളുടെയും ഗുരുതരാവസ്ഥയിലാകുന്നവരുടെ എണ്ണവും പ്രതിദിനം കുറഞ്ഞ് വരുന്നത് വലിയ ആശ്വാസം നൽകുന്നുണ്ട്. സൗദിയിലെ മുഴുവൻ പട്ടണങ്ങളിൽ 100 ൽ താഴെ മാത്രമാണു പുതുതായി വൈറസ് ബാധ സ്ഥിരീകരിച്ചത്.