യുക്രെയ്ൻ അഭയാർത്ഥികൾക്ക് സൗജന്യമായി വിംബിൾഡൺ ടെന്നീസ് ടൂർണമെന്റ് കാണാൻ ഓൾ ഇംഗ്ലണ്ട് ലോൺ ടെന്നീസ് ക്ലബ്ബ് അവസരമൊരുക്കുന്നു. യുക്രെയ്ൻ അഭയാർത്ഥികൾക്ക് പിന്തുണ നൽകുന്നതിന്റെ ഭാഗമായിട്ടാണ് നടപടി.
റഷ്യൻ അധിനിവേശത്തെത്തുടർന്ന് ദുരിതമനുഭവിക്കുന്ന യുക്രെയ്ൻ അഭയാർത്ഥികൾക്ക് 250,000 പൗണ്ടിന്റെ ധനസഹായവും അധികൃകതർ പ്രഖ്യാപിച്ചു.നേരത്തേ യുക്രെയ്ൻ അധിനിവേശത്തെത്തുടർന്ന് റഷ്യൻ താരങ്ങൾക്ക് വിംബിൾഡൺ വിലക്കേർപ്പെടുത്തിയിരുന്നു. ഇതിന് പിന്നാലെയാണ് അധികൃതരുടെ പുതിയ പ്രഖ്യാപനം.
27-നാണ് സെന്റർ കോർട്ടിൽ വിംബിൾഡൺ മത്സരങ്ങൾ ആരംഭിക്കുന്നത്. ഓസ്ട്രേലിയൻ ഓപ്പണും ഫ്രഞ്ച് ഓപ്പണും ജയിച്ച നദാൽ പുൽക്കോർട്ടിലെ പ്രകടനം കാണാനും ആരാധകർ കാത്തിരിക്കുകയാണ്. 12 മാസത്തെ ഇടവേളക്ക് ശേഷം കോർട്ടിലേക്ക് തിരിച്ചെത്തിയ സെറീന വില്യംസും വിംബിൾഡണിൽ മത്സരിക്കാനെത്തുമെന്നാണ് പ്രതീക്ഷിക്കുന്നത്. കരിയറിലെ 24-ാം ഗ്രാൻഡ് സ്ലാം ആണ് സെറീനയുടെ ലക്ഷ്യം.
