ബർമിങ്ങാം: ബ്രിട്ടനിൽ ഒരു മലയാളി കൂടി കോവിഡ് ബാധിച്ചു മരിച്ചു. യുകെ ബർമിങ്ങാമിൽ സ്ഥിരതാമസമായ കങ്ങഴ മുണ്ടത്താനത്ത് കല്ലോലിക്കൽ കുടുംബാംഗമായ ഡോ.അമിറുദ്ദീൻ (73) ആണ് മരിച്ചത്. മൂന്നാഴ്ചയായി കോവിഡ് 19 രോഗബാധിതനായി ചികിത്സയില്‍ ആയിരുന്നു. ബ്രിട്ടനിൽ കോവിഡ് ബാധിച്ച് മരിക്കുന്ന ആറാമത്തെ മലയാളിയാണ് ഇദ്ദേഹം. യൂറോപ്പിലെ എട്ടാമത്തെ മലയാളിയും.
തിരുവനന്തപുരം മെഡിക്കൽ കോളജിൽ നിന്നും മെഡിസിൻ പഠനം പൂർത്തിയാക്കിയ ഡോ. അമിറുദ്ദീൻ 30 വർഷം മുൻപാണ് ബ്രിട്ടനിൽ എത്തിയത്. ജിപി സർജറിയിൽ ആയിരുന്നു പ്രധാനമായും ജോലി ചെയ്തിരുന്നത്. ബ്രിട്ടനിൽ കൂടുതൽ മലയാളികൾ കോവിഡ് ബാധിതരാകുന്ന വാർത്തകളാണ് ദിവസവും പുറത്തുവരുന്നത്. നിലവിൽ കോവിഡ് ബാധിച്ച് പത്തിലധികം ആളുകൾ വെന്റിലേറ്ററിൽ ഗുരുതരാവസ്ഥയിലാണ്.
