കൊച്ചി: നടിയെ ആക്രമിച്ച കേസുമായി ബന്ധപ്പെട്ട വിവരങ്ങൾ പ്രസിദ്ധീകരിക്കുന്നതു വിലക്കണം എന്ന ആവശ്യവുമായി നടൻ ദിലീപ് ഹൈക്കോടതിയിൽ. രഹസ്യ വിചാരണയ്ക്കുള്ള നിർദേശങ്ങൾ മാധ്യമങ്ങൾ പിന്തുടരുന്നില്ല എന്ന ആക്ഷേപവും ദിലീപ് ഉയർത്തിയിട്ടുണ്ട്. കേസ് വിവരങ്ങൾ പ്രസിദ്ധീകരിക്കരുതെന്നു മാധ്യമങ്ങൾക്കു നിർദേശം നൽകണം എന്നാണ് ദിലീപിന്റെ ആവശ്യം.
നേരത്തേ ദിലീപിന്റെ അഭിഭാഷകനാണ് കേസ് വിചാരണ അടച്ചിട്ട കോടതി മുറിയിൽ വേണമെന്ന ആവശ്യം ഉയർത്തിയത്. തുറന്ന കോടതിയിൽ വിചാരണ നടക്കുന്നത് ആക്രമണത്തിന് ഇരയായ നടിയുടെ സ്വകാര്യതയെ ബാധിക്കും എന്നതു പരിഗണിച്ച് പ്രോസിക്യൂഷൻ ഈ ആവശ്യം അംഗീകരിക്കുകയായിരുന്നു. മറ്റു കോടതികളിലെ വിവരങ്ങളും പ്രസിദ്ധീകരിക്കരുത് എന്നു നിർദേശിക്കണമെന്നാണ് ദിലീപിന്റെ ഇപ്പോഴത്തെ ആവശ്യം.