കൊച്ചി: ക്രൊയേഷ്യന്‍ പ്രതിരോധ താരം മാര്‍ക്കോ ലെസ്‌കോവിച്ചുമായുള്ള കരാര്‍ പുതുക്കി കേരള ബ്ലാസ്റ്റേഴ്‌സ്. 2024 വരെയാണ് പുതിയ കരാര്‍. ജിഎന്‍കെ ഡൈനാമോ സാഗ്രെബില്‍ (ഡൈനാമോ സാഗ്രെബ്) നിന്നാണ് ലെസ്‌കോവിച്ച് ബ്ലാസ്റ്റേഴ്സിലെത്തിയത്.
കേരള ബ്ലാസ്റ്റേഴ്സിനൊപ്പം തുടരുന്നതിന്റെ ആവേശത്തിലാണ് താനെന്നും ഈ സീസണില്‍ കപ്പ് മാത്രമാണ് ലക്ഷ്യമെന്നും കരാര്‍ നീട്ടിയതിനു പിന്നാലെ ലെസ്‌കോവിച്ച് പ്രതികരിച്ചു.
2009-ല്‍ പ്രൊഫഷണല്‍ ഫുട്‌ബോള്‍ കരിയര്‍ ആരംഭിച്ച ലെസ്‌കോവിച്ചിന്റെ തുടക്കം എന്‍ കെ ഒസിയെക്കിന്റെ യൂത്ത് ടീമിലൂടെയായിരുന്നു. 2011-ല്‍ സീനിയര്‍ ടീമിനായി അരങ്ങേറി. 56 മത്സരങ്ങളില്‍ നിന്നായി അഞ്ച് ഗോളുകളും നേടി. ദേശീയ തലത്തില്‍ അണ്ടര്‍ 18 മുതല്‍ അണ്ടര്‍ 21 വരെയുള്ള എല്ലാ യൂത്ത് മത്സരങ്ങളിലും ലെസ്‌കോവിച്ച് രാജ്യത്തിനായി കളിച്ചിട്ടുണ്ട്.
