ന്യൂഡല്ഹി: “ജൂലായ് എത്തി, എന്നാല് വാക്സിന് ഇതുവരെ എത്തിയില്ല,” എന്ന് രാഹുൽ ഗാന്ധിയുടെ ട്വീറ്റിനെതിരെ ആരോഗ്യ മന്ത്രി ഹര്ഷവര്ധന്. ”ജൂലായ് മാസത്തെ വാക്സിന് ലഭ്യത സംബന്ധിച്ച വസ്തുതകള് കഴിഞ്ഞദിവസം വ്യക്തമാക്കിയിരുന്നതാണെന്നും, അഹങ്കാരത്തിനും വിവരമില്ലായ്മയ്ക്കും വാക്സിന് ലഭ്യമല്ലെന്നും ഒരു നേതൃമാറ്റത്തെക്കുറിച്ച് കോണ്ഗ്രസ് ചിന്തിക്കണ൦”എന്നും രാഹുൽ ഗാന്ധിയുടെ ആരോപണത്തിനെതിരെ ഹര്ഷവര്ധന് ട്വീറ്റ് ചെയ്തു. കേന്ദ്ര സര്ക്കാര് 75 ശതമാനം വാക്സിനും സൗജന്യമാക്കിയതോടെ ജൂണ് മാസത്തില് 11.5 കോടി ഡോസ് വാക്സിന് നല്കാന് സാധിച്ചിട്ടുണ്ടെന്നും ഹര്ഷവര്ധന് ട്വീറ്റില് ചൂണ്ടിക്കാട്ടി.
വാക്സിനേഷനെതിരേ പ്രതിപക്ഷം ഉത്തരവാദിത്തരഹിതമായ പ്രസ്താവനകള് നടത്തുകയാണെന്ന് ഹര്ഷ വര്ധന് ഇന്നലെ ആരോപിച്ചിരുന്നു. ഇതുവരെ കേന്ദ്ര സര്ക്കാരിന്റെ സൗജന്യ വാക്സിന് പദ്ധതി പ്രകാരം 32.92 കോടി ഡോസ് വാക്സിന് സംസ്ഥാനങ്ങള്ക്ക് നല്കിയിട്ടുണ്ടെന്ന് ആരോഗ്യ മന്ത്രാലയം വ്യക്തമാക്കി.