കൊല്ലം: കൊല്ലം തെന്മല ഉറുകുന്നിൽ ഉണ്ടായ വാഹനാപകടത്തിൽ മൂന്നു പെൺകുട്ടികൾ മരിച്ചു. ശാലിനി (14), ശ്രുതി (11), കെസിയ (16) എന്നിവരാണു മരിച്ചത്. പെൺകുട്ടികൾ റോഡിനരികിലൂടെ നടന്നു പോവുന്നതിനിടയിൽ പിക്ക് അപ്പ് വാൻ നിയന്ത്രണം വിട്ട് കുട്ടികളെ ഇടിച്ച് തെറിപ്പിക്കുകയായിരുന്നു. തുടർന്ന് വാൻ അടുത്ത വയലിലേക്ക് മറിഞ്ഞു.
ഇന്ന് വൈകിട്ടാണ് അപകടം സംഭവിച്ചത്. പുനലൂരിൽ നിന്ന് തമിഴ്നാട്ടിലേക്ക് പോവുകയായിരുന്ന മിനിലോറി ഇടിച്ചാണ് കുട്ടികൾ മരിച്ചത്. ഉറുകുന്ന് സ്വദേശികളായ അലക്സ് – സിന്ധു ദമ്പതികളുടെ മക്കളാണ് ശാലിനിയും ശ്രുതിയും. ഇവരുടെ അയൽവാസി കുഞ്ഞുമോന്റെ മകളാണ് കെസിയ. മൂന്ന് കുട്ടികളുടെയും മൃതദേഹങ്ങൾ നാളെ പോസ്റ്റ്മോർട്ടത്തിനും കോവിഡ് പരിശോധനയ്ക്കും ശേഷം ബന്ധുക്കൾക്ക് വിട്ട് നൽകും.