തിരുവനന്തപുരം: കോവിഡ് 19 രോഗമല്ലാത്ത കാരണങ്ങളാല് ഗള്ഫ് രാജ്യങ്ങളില് മരണപ്പെടുന്ന മലയാളികളുടെ മൃതദേഹം നാട്ടിലെത്തിക്കുന്നതിനുള്ള കാലതാമസവും തടസ്സവും ഒഴിവാക്കാൻ നടപടി സ്വീകരിക്കണമെന്നാവശ്യപ്പെട്ട് പ്രധാനമന്ത്രിക്ക് കേരള മുഖ്യമന്ത്രി പിണറായി വിജയന്റെ കത്ത്.
മൃതദേഹങ്ങള് നാട്ടിലേക്ക് എത്തിക്കുന്നതിന് തടസ്സങ്ങളും പ്രയാസങ്ങളും നേരിടുന്നതായി ജി.സി.സി രാജ്യങ്ങളിലെ മലയാളി സംഘടനകളില് നിന്ന് ധാരാളം പരാതികള് ലഭിക്കുന്നുണ്ട്. അന്താരാഷ്ട്ര ഫ്ളൈറ്റുകൾ നിര്ത്തിവെച്ചത് പ്രവാസികളെ ഇപ്പോള് തന്നെ വലിയ പ്രയാസത്തിലും കടുത്ത മാനസിക സമ്മര്ദ്ദത്തിലുമാക്കിയിട്ടുണ്ട്. അതിനിടയിലാണ് പുതിയ പ്രശ്നം.
മൃതദേഹം നാട്ടിലെത്തിക്കുന്നതിനുള്ള തടസ്സങ്ങളും കാലതാമസവും ഒഴിവാക്കാന് ബന്ധപ്പെട്ട ഇന്ത്യന് എംബസികള്ക്ക് നിര്ദേശം നല്കണമെന്ന് കത്തിൽ മുഖ്യമന്ത്രി ആവശ്യപ്പെട്ടു.
മൃതദേഹങ്ങള് നാട്ടിലേക്ക് അയക്കുന്നതിനുള്ള അപേക്ഷ പരിഗണിക്കുന്നതിന് ഇന്ത്യന് എംബസിയുടെ ക്ലിയറന്സ് സര്ട്ടിഫിക്കറ്റ് വേണം. എന്നാൽ കേന്ദ്ര ആഭ്യന്തര മന്ത്രാലയത്തിൽ നിന്ന് നോ ഒബ്ജക്ഷൻ സർട്ടിഫിക്കറ്റ് വേണമെന്ന് നിർബന്ധിക്കുകയാണ്. കോവിഡ്-19 കാരണമല്ലാതെ മരണപ്പെടുന്നവരുടെ മൃതദേഹങ്ങള് നാട്ടിലെത്തിക്കാന് കേന്ദ്രസര്ക്കാര് നേരത്തെ അനുവദിച്ചിട്ടുണ്ട്. അതിന് നോ ഒബ്ജക്ഷൻ സർട്ടിഫിക്കറ്റിന്റെ ആവശ്യമില്ല.
അന്താരാഷ്ട്ര ഫ്ളൈറ്റകള് നിര്ത്തിയതുകൊണ്ട് ചരക്ക് വിമാനങ്ങളിലാണ് മൃതദേഹങ്ങള് ഇപ്പോൾ അയച്ചുകൊണ്ടിരിക്കുന്നതെന്നും കത്തിൽ പറയുന്നു.ആഭ്യന്തര മന്ത്രലയത്തിന്റെ നോ ഒബ്ജക്ഷന് സര്ട്ടിഫിക്കറ്റ് ഇല്ലാതെ തന്നെ മൃതദേഹങ്ങള് അയക്കുന്നതിന് ക്ലിയറന്സ് നല്കാന് എംബസികള്ക്ക് നിര്ദേശം നല്കണമെന്ന് കത്തിൽ ആവശ്യപ്പെടുന്നു.
നൂലാമാലകള് ഒഴിവാക്കി മൃതദേഹങ്ങള് താമസമില്ലാതെ നാട്ടിലെത്തിക്കാനും കുടുംബാംഗങ്ങള്ക്ക് അന്ത്യകര്മങ്ങള് നടത്താനും സൗകര്യമൊരുക്കണമെന്നും മുഖ്യമന്ത്രി ആവശ്യപ്പെട്ടു.