50:50 EU:Non-EU സ്റ്റാഫ് റൂളിന്റെ പേരിൽ മാസങ്ങളായി തൊഴിൽ അനുമതി (Work Permit) പുതുക്കൽ വൈകുകയും ചില അപേക്ഷകൾ നിരസിക്കപ്പെടുകയും ചെയ്തതിനെ തുടർന്ന് പ്രതിസന്ധിയിലായിരുന്ന നിരവധി Healthcare Assistants (HCA)മാർക്കും നഴ്സുമാർക്കും ആശ്വാസം നൽകുന്ന തരത്തിൽ അനുകൂല തീരുമാനങ്ങൾ ലഭിച്ചു തുടങ്ങുന്നതായി മൈഗ്രന്റ് നഴ്സസ് അയർലണ്ട് അറിയിച്ചു.
Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2
അയർലണ്ടിലെ നിരവധി Nursing Homes, Nursing Home Groups എന്നിവ 50:50 നിയമം പാലിച്ചുകൊണ്ട് ഹെൽത്ത്കെയർ അസിസ്റ്റന്റുമാരെ നിയമിക്കുകയും വർക്ക് പെർമിറ്റ് അനുവദിക്കുകയും ചെയ്തിരുന്നു. എന്നാൽ, അതേ ജീവനക്കാരുടെ വർക്ക് പെർമിറ്റ് പുതുക്കേണ്ട ഘട്ടത്തിലെത്തിയപ്പോൾ, 50:50 നിയമത്തിന്റെ ലംഘനം എന്നു ചൂണ്ടിക്കാട്ടി വർക്ക് പെർമിറ്റ് പുതുക്കൽ നടപടികൾ വൈകുകയോ ചില അപേക്ഷകൾ നിരസിക്കപ്പെടുകയോ ചെയ്തതായി ബാധിതർ MNIയെ സമീപിച്ച് പരാതിപ്പെട്ടിരുന്നു.
മാസങ്ങൾക്കു മുമ്പ് HCA യൂണിയൻ കോ-ഓർഡിനേറ്റർമാരായ ഷിജിയും രാജേഷും ഈ വിഷയവുമായി ബന്ധപ്പെട്ട് നിരവധി Healthcare Assistants-ന്റെ പരാതികൾ MNI ദേശീയ നേതൃത്വത്തിന്റെ ശ്രദ്ധയിൽപ്പെടുത്തി. തുടർന്ന് MNI ഈ വിഷയം തൊഴിലാളി സംഘടനകളായ Unite, MRCI എന്നിവരുടെ ശ്രദ്ധയിൽ കൊണ്ടുവന്നു. പിന്നീട് MNI ദേശീയ നേതൃത്വവും Work Permit വകുപ്പ്, ബന്ധപ്പെട്ട മന്ത്രിമാർ, വിവിധ ട്രേഡ് യൂണിയനുകൾ എന്നിവരുമായി തുടർച്ചയായി ആശയവിനിമയം നടത്തി വിഷയത്തിന്റെ ഗൗരവം ബോധ്യപ്പെടുത്തി.
50:50 നിയമവുമായി ബന്ധപ്പെട്ട ഈ പ്രതിസന്ധി Healthcare Assistants-നെ മാത്രമല്ല, Atypical Work Permit, Visa എന്നിവയിലൂടെ അയർലണ്ടിലെ Nursing Homes-ൽ എത്തിച്ച നിരവധി നഴ്സുമാരെയും ബാധിച്ചതായി MNI ചൂണ്ടിക്കാട്ടി. ആവശ്യമായ aptitude പരീക്ഷകളും മറ്റ് യോഗ്യതകളും വിജയകരമായി പൂർത്തിയാക്കിയ ശേഷവും Critical Skills Employment Permit-ലേക്ക് മാറേണ്ട അപേക്ഷകൾ വൈകുകയോ തടസ്സപ്പെടുകയോ ചെയ്തതോടെ നിരവധി നഴ്സുമാർ തൊഴിൽ അനിശ്ചിതത്വത്തിലായി.
ഇതിന്റെ ഫലമായി നിരവധി Healthcare Assistants-നും നഴ്സുമാർക്കും സാധുവായ IRP (Irish Residence Permit) ഇല്ലാതെ രാജ്യത്ത് തുടരേണ്ട സാഹചര്യം ഉണ്ടാവുകയും തൊഴിൽ നഷ്ടപ്പെടുന്ന അവസ്ഥയിലേക്കും ചിലർ നീങ്ങേണ്ടിവന്നതായും MNI വ്യക്തമാക്കി. ഈ വിഷയത്തിൽ MNI ദീർഘകാലമായി തുടർച്ചയായ ഇടപെടലുകൾ നടത്തിയതായി സംഘടന അറിയിച്ചു. INMO, Unite ഉൾപ്പെടെയുള്ള ട്രേഡ് യൂണിയനുകളുമായും, MRCI, Work Permit വകുപ്പ്, ബന്ധപ്പെട്ട സർക്കാർ അധികാരികൾ, മന്ത്രിമാർ എന്നിവരുമായും ലെറ്റർ അയച്ചും ചർച്ചകൾ നടത്തിയുമാണ് ബാധിതരുടെ പ്രശ്നങ്ങൾ പരിഹരിക്കാൻ ശ്രമിച്ചതെന്ന് സംഘടന അറിയിച്ചു.
ഇതിന്റെ ഭാഗമായി നിരവധി അംഗങ്ങൾക്ക് മറ്റ് തൊഴിലുടമകളുടെ കീഴിൽ പുതിയ തൊഴിലവസരങ്ങൾ ലഭിക്കാനും, Work Permit പുതുക്കലുകൾ അംഗീകരിക്കപ്പെടാനും, മാസങ്ങളായി നീണ്ടുനിന്ന അപേക്ഷാ കാലതാമസങ്ങൾ പരിഹരിക്കപ്പെടാനും തുടങ്ങിയതായി MNI അറിയിച്ചു. ഇതുവഴി ഏറെ നാളായി അനിശ്ചിതത്വത്തിലായിരുന്ന നിരവധി കുടുംബങ്ങൾക്ക് ആശ്വാസമായിരിക്കുകയാണ്.
ഒരു വ്യക്തിയെ അയർലണ്ടിലേക്ക് നിയമപരമായി റിക്രൂട്ട് ചെയ്യുകയും, Work Permit അനുവദിക്കുകയും ചെയ്ത ശേഷം, പുതുക്കൽ ഘട്ടത്തിൽ വീണ്ടും 50:50 നിയമം ചൂണ്ടിക്കാട്ടി ബുദ്ധിമുട്ടിലാക്കുന്നത് മനുഷ്യത്വപരമല്ലെന്ന നിലപാടാണ് MNI അധികാരികളുടെ മുന്നിൽ ശക്തമായി ഉന്നയിച്ചിരുന്നത്. Work Permit പുതുക്കലിന് 50:50 നിയമം ബാധകമല്ലെന്ന് ഔദ്യോഗിക മാർഗനിർദേശങ്ങളിൽ വ്യക്തമാക്കിയിട്ടും പ്രായോഗിക തലത്തിൽ ചിലർക്കുണ്ടായിരുന്ന ബുദ്ധിമുട്ടുകൾ അവസാനിപ്പിക്കണമെന്ന ആവശ്യവും സംഘടന മുന്നോട്ടുവച്ചു.
അതുപോലെ, Atypical Work Permit വഴി നിയമപരമായി രാജ്യത്ത് എത്തിയ നഴ്സുമാർ ആവശ്യമായ പരീക്ഷകളും രജിസ്ട്രേഷൻ നടപടികളും പൂർത്തിയാക്കി അതേ തൊഴിലുടമയുടെ കീഴിൽ പുതിയ critical സ്കിൽ Work Permit-ലേക്ക് മാറുമ്പോൾ വീണ്ടും അനാവശ്യ പ്രതിസന്ധികൾ നേരിടേണ്ട സാഹചര്യം ഉണ്ടാകരുതെന്നും MNI ആവശ്യപ്പെട്ടു.
ഇപ്പോൾ Work Permit വൈകലുകളും നിരസിക്കപ്പെട്ട കേസുകളിലും അനുകൂല തീരുമാനങ്ങൾ ലഭിച്ചു തുടങ്ങുന്ന സാഹചര്യത്തിൽ സംഘടന സന്തോഷം രേഖപ്പെടുത്തി. എന്നിരുന്നാലും, ഇപ്പോഴും നിരവധി Healthcare Assistants-ന്റെയും നഴ്സുമാരുടെയും കേസുകൾ പരിഹാരത്തിനായി കാത്തിരിക്കുകയാണെന്നും, എല്ലാ അംഗങ്ങൾക്കും നീതി ലഭിക്കുന്നതുവരെ പോരാട്ടം തുടരുമെന്നും മൈഗ്രന്റ് നഴ്സസ് അയർലണ്ട് ദേശീയ നേതൃത്വം അറിയിച്ചു.
Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S
Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==
