കൊവിഡ്-19 രൂക്ഷമായി പടരുന്ന ന്യൂയോര്ക്കിന് സഹായവുമായി ചൈനീസ് സര്ക്കാര്. 1000 വെന്റിലേറ്ററുകളാണ് ചൈന ന്യൂയോര്ക്കിലേക്ക് കയറ്റി അയക്കുന്നത്. കഴിഞ്ഞ ദിവസം നടന്ന പത്രസമ്മേളനത്തിലാണ് ന്യൂയോര്ക്ക് ഗവര്ണര് ആന്ഡ്ര്യൂ ക്യുമോ ഇക്കാര്യം വ്യക്തമാക്കിയത്. ഇത് വലിയ ഒരു കാര്യമാണെന്നാണ് ഗവര്ണര് ചൈനയുടെ സഹായത്തെക്കുറിച്ച് പറഞ്ഞത്.
ചൈനീസ് കമ്പനിയായ ആലിബാബ മുഖേനയാണ് വെന്റിലേറ്ററുകള് നല്കുന്നത്. ചൈനയുടെ സഹായവാഗ്ദാനത്തിന് ന്യൂയോര്ക്കിലെ ചൈനീസ് കൗണ്സില് ജനറലിലും ആലിബാബ സ്ഥാപകരായ ജാക് മായ്ക്കും, ജോ സായ്ക്കും ഗവര്ണര് നന്ദി പറഞ്ഞു.
ശനിയാഴ്ച ജോണ് എഫ് കെന്നഡി അന്താരാഷ്ട്ര വിമാനത്താവളത്തില് ചൈനയുടെ വെന്റിലേറ്ററുകള് എത്തും. കൊവിഡ് ബാധിതരുടെ എണ്ണം ക്രമാതീതമായി ഉയരുന്ന അമേരിക്കയില് വെന്റിലേറ്ററുകള്ക്ക് ക്ഷാമം നേരിടുന്ന സാഹചര്യത്തിലാണ് ചൈനയുടെ സഹായം. വെന്റിലേറ്ററുകള് ലഭ്യമല്ലാത്തതിന്റെ പേരില് ന്യൂയോര്ക്ക് ഗവര്ണറും അമേരിക്കന് പ്രസിഡന്റ് ഡൊണാള്ഡ് ട്രംപും അസ്വാരസ്യം നിലനില്ക്കെയാണ് ചൈനയുടെ സഹായം.
കൊവിഡ് മരണം കൂടുന്ന സാഹചര്യത്തില് ന്യയോര്ക്കിന് അടിയന്തര സഹായം അമേരിക്കന് സര്ക്കാര് നല്കണമെന്ന് ഗവര്ണര് ആന്ഡ്രൂ ക്യുമൊ നേരത്തെ ആവശ്യപ്പെട്ടിരുന്നു.
എന്നാല് ന്യൂയോര്ക്കിന് ആവശ്യത്തിന് സഹായം നല്കിയിട്ടുണ്ടെന്നും ഇനിയും വെന്റിലേറ്ററുകള് ന്യൂയോര്ക്കിന് നല്കേണ്ടെന്നുമാണ് പ്രസിഡന്റ് ഡൊണാള്ഡ് ട്രംപ് പ്രതികരിച്ചത്.
