കാന്ബെറ: ലോക ഒന്നാം നമ്പര് വനിതാ ടെന്നീസ് താരം ഓസ്ട്രേലിയയുടെ ആഷ്ലി ബാര്ട്ടി വിരമിക്കല് പ്രഖ്യാപിച്ചു. ജനുവരിയില് ഓസ്ട്രേലിയന് ഓപ്പണ് കിരീടം നേടി രണ്ടു മാസത്തിനുള്ളിലാണ് ആഷ്ലിയുടെ വിരമിക്കല് പ്രഖ്യാപനം. സാമൂഹിക മാധ്യമങ്ങളിലൂടെയാണ് താരം പ്രഖ്യാപനം നടത്തിയിട്ടുള്ളത്.
‘എനിക്ക് കൂടുതല് ഒന്നും നല്കാനില്ലെന്ന് എനിക്ക് ശാരീരികമായി അറിയാം… ഈ മനോഹരമായ കായിക വിനോദത്തിന് എനിക്ക് കഴിയുന്നതെല്ലാം ഞാന് നല്കിയിട്ടുണ്ട്’ 25 വയസ് മാത്രം പ്രായമുള്ളപ്പോൾ വിരമിക്കല് പ്രഖ്യാപനത്തിന് പിന്നാലെ അവര് പ്രതികരിച്ചതിങ്ങനെയാണ്.
2019 ലെ ഫ്രഞ്ച് ഓപ്പണ് കിരീടമാണ് ആഷ്ലിയുടെ ആദ്യ ഗ്രാന്ഡ്സ്ലാം . 44 വര്ഷത്തിനിടയില് ഓസ്ട്രേലിയന് ഓപ്പണ് കിരീടം നേടുന്ന ആദ്യ ഓസ്ട്രേലിയക്കാരി എന്ന നേട്ടവും ജനുവരിയില് അവര് സ്വന്തമാക്കി. 2019-ല് ഫ്രഞ്ച് ഓപ്പണ്, 2021-ല് വിംബിള്ഡണ്, 2022 ഓസ്ട്രേലിയന് ഓപ്പണ് എന്നിവയടക്കം മൂന്ന് ഗ്രാന്ഡ്സ്ലാം സിംഗിള്സ് കിരീടങ്ങളാണ് താരം സ്വന്തമാക്കിയിട്ടുള്ളത്. കഴിഞ്ഞ മൂന്ന് കലണ്ടര് വര്ഷങ്ങളില് ലോകത്തെ ഒന്നാം റാങ്കുകാരിയായി ആഷ്ലി തുടര്ന്നത് ശ്രദ്ധേയമായ നേട്ടമാണ്. 2018-ലെ യുഎസ് ഓപ്പണ് വനിതാ ഡബിള്സില് കൊക്കോ വാന്ഡെവെഗെയ്ക്കൊപ്പം കിരീടം ചൂടിയിട്ടുണ്ട്.