ന്യൂഡൽഹി: അതിർത്തിയിൽ സൈനികരുടെ വിന്യാസം ചൈന വർധിപ്പിച്ചിട്ടുണ്ടെന്ന് ഇന്ത്യൻ സേനാ മേധാവി ജനറൽ എം.എം.നരവനെ. അതിർത്തിയിലെ നീക്കങ്ങളെല്ലാം ഇന്ത്യ നിരീക്ഷിച്ചു വരികയാണ്. സൈന്യത്തെ വിന്യസിക്കുന്നതിന്റെ ഭാഗമായി നിയന്ത്രണ രേഖയ്ക്കു സമീപം ചൈന നിർമാണ പ്രവർത്തനങ്ങള്‍ നടത്തുന്നുണ്ട്. ലഡാക്കിൽ ഇന്ത്യ–ചൈന സൈനികർ തമ്മിലുണ്ടായ ഏറ്റുമുട്ടലിനെ തുടർന്നുള്ള പതിമൂന്നാം വട്ട ചർച്ചകൾ അടുത്ത ആഴ്ച നടക്കാനിരിക്കെയാണ് ചൈനയുടെ പ്രകോപനം.
കഴിഞ്ഞ ആറു മാസമായി സാഹചര്യങ്ങൾ സാധാരണ രീതിയിലാണ്. അതിർത്തിയിൽ ആധുനിക ആയുധ ശേഖരങ്ങൾ തയാറാണെന്നും ഏതൊരു സാഹചര്യവും നമ്മൾ നേരിടുമെന്നും ചർച്ചകളിലൂടെ പ്രശ്നം പരിഹരിക്കാൻ സാധിക്കുമെന്നാണു കരുതുന്നതെന്നും ഫലം നേടാനാകുമെന്നാണു പ്രതീക്ഷയെന്നും ഇന്ത്യൻ സേനാ മേധാവി അറിയിച്ചു.
