യുഎഇയിൽ അനധികൃതമായി പടക്കം പൊട്ടിക്കുന്നവർക്കു തടവും 50000 ദിർഹം (11.1 ലക്ഷം രൂപ) പിഴയും ശിക്ഷയുണ്ടാകുമെന്നു പബ്ലിക് പ്രോസിക്യുഷന്റെ മുന്നറിയിപ്പ്.പ്രത്യേക അനുമതി എടുക്കാതെ സ്ഫോടക വസ്തുക്കൾ ഇറക്കുമതി ചെയ്യുന്നതും കയറ്റുമതി ചെയ്യുന്നതും വിൽപന നടത്തുന്നതുമായവ്യാപാരികൾക്ക് ഒരു വർഷം തടവോ ഒരു ലക്ഷം ദിർഹം പിഴയോ രണ്ടും ചേർത്തോ ശിക്ഷ ലഭിക്കും. പെരുന്നാൾ ആഘോഷത്തിന് പൊലിമ കൂട്ടാൻ അനധികൃതമായി പടക്കം പൊട്ടിക്കുന്നത് കുട്ടികളുടെ ആരോഗ്യ സുരക്ഷയ്ക്ക് ഭീഷണിയാണെന്ന് അബുദാബി പൊലീസ് ഓർമിപ്പിച്ചു.
കാഴ്ച നഷ്ടപ്പെടാനും തീപിടിത്തം ഉണ്ടാകാനും ഇതിടയാക്കും. പടക്കം പൊട്ടിക്കുമ്പോഴുള്ള അശ്രദ്ധ കുട്ടികൾക്ക് പൊള്ളലേറ്റ് താൽക്കാലികമോ സ്ഥിരമോ വൈകല്യമുണ്ടാക്കുമെന്നും സൂചിപ്പിച്ചു. നിസ്സാര അശ്രദ്ധ വൻ അത്യാഹിതത്തിലേക്കു നയിച്ചേക്കാം. ജനങ്ങളുടെ ജീവനും സ്വത്തിനും സംരക്ഷണം ഉറപ്പുവരുത്തുന്നതിന്റെ ഭാഗമായാണ് മുന്നറിയിപ്പ്.
ലൈസൻസ് എടുക്കാതെ പടക്കം നിർമിക്കുക, ഉപയോഗിക്കുക, വിൽക്കുക, മറ്റു സ്ഥലങ്ങളിലേക്കു കൊണ്ടുപോകുക എന്നിവയും കുറ്റകരമാണ്. ഇതുസംബന്ധിച്ച് സമൂഹമാധ്യമങ്ങളിൽ ബോധവൽക്കരണവും ആരംഭിച്ചു.നിയമ ലംഘകരെ കുറിച്ച് 999 എന്ന നമ്പറിലോ 800 2626 എന്ന ടോൾ ഫ്രീ നമ്പറിൽ വിളിച്ച് അറിയിക്കണമെന്നും നിർദ്ദേശമുണ്ട്.
GNN NEWS IRELAND നിന്നുള്ള പ്രധാന വാര്‍ത്തകളും, ബ്രേക്കിംഗ് ന്യൂസുകളും വാട്സാപ്പില്‍ ലഭിക്കുവാന്‍ താഴെയുള്ള ലിങ്കില്‍ ക്ലിക്ക് ചെയ്ത് ജോയിന്‍ ചെയ്യുക.
https://chat.whatsapp.com/KXg5ATjfgOo56Mw3BJd38f
