വിദേശ രാജ്യങ്ങളിൽ ഇന്ത്യക്കാർക്കെതിരായ പ്രതിഷേധങ്ങളും ആക്രമണങ്ങളും വർധിക്കുന്നതിനെക്കുറിച്ച് ഏറെ ചർച്ചകൾ ഉയരുന്ന സാഹചര്യമാണ് നിലവിലുള്ളത്. ഇത്തരം സംഭവങ്ങൾക്ക് “വംശീയ വിദ്വേഷം” എന്ന വിശദീകരണം മാത്രമാണ് സാധാരണയായി മുന്നോട്ട് വരുന്നത്. എന്നാൽ വിദേശ രാജ്യങ്ങളിലെ പൊതുസമൂഹത്തിലും സോഷ്യൽ മീഡിയയിലും നടക്കുന്ന ചർച്ചകളിൽ മറ്റൊരു വശവും ശ്രദ്ധേയമാകുന്നു. ഇന്ത്യക്കാരായ ചിലരുടെ പെരുമാറ്റവും സമീപനവും പ്രാദേശികരിൽ അസ്വസ്ഥത സൃഷ്ടിക്കുന്നുവെന്നാണ് പ്രധാനയും ഉയരുന്ന വിമർശനം.
Join GNN24X7 IRELAND Whatsapp Group 🔗 https://chat.whatsapp.com/HCHNSM0uwJ54sRAzNI1ur2
വിദേശത്തേക്ക് കുടിയേറുന്നവരിൽ വലിയൊരു വിഭാഗം ആ രാജ്യത്തിന്റെ നിയമങ്ങളെയും സംസ്കാരത്തെയും ജീവിതരീതികളെയും മാനിച്ച് ജീവിക്കുന്നവരാണ്. എന്നാൽ ഒരു ചെറിയ വിഭാഗത്തിന്റെ പ്രവർത്തികൾ മുഴുവൻ ഇന്ത്യൻ സമൂഹത്തിന്റെയും പ്രതിച്ഛായയെ ബാധിക്കുന്ന സാഹചര്യം രൂപപ്പെടുന്നുണ്ട്. പൊതുസ്ഥലങ്ങളിലെ ശുചിത്വക്കുറവ്, ഗതാഗത നിയമങ്ങൾ പാലിക്കാതിരിക്കൽ, അമിതമായി ശബ്ദമുണ്ടാക്കൽ, പൊതുഇടങ്ങളിലെ അച്ചടക്കക്കുറവ് തുടങ്ങിയ കാര്യങ്ങൾ പല രാജ്യങ്ങളിലും ഇന്ത്യൻ സമൂഹത്തിനെതിരെ ഉയരുന്ന പരാതികളിൽ ഉൾപ്പെടുന്നു. സോഷ്യൽ മീഡിയയിൽ പ്രചരിക്കുന്ന നിരവധി വീഡിയോകളും ഇത്തരം ചർച്ചകൾക്ക് ഇന്ധനം പകരുന്നുണ്ട്.
മറ്റൊരു വിമർശനം പ്രാദേശിക സമൂഹവുമായി ഇടകലരാനുള്ള താത്പര്യക്കുറവാണ്. വർഷങ്ങളോളം ഒരു രാജ്യത്ത് താമസിച്ചിട്ടും ആ രാജ്യത്തിന്റെ ഭാഷയോ സംസ്കാരമോ പഠിക്കാൻ ശ്രമിക്കാതെ സ്വന്തം കൂട്ടായ്മകളിൽ മാത്രം ഒതുങ്ങുന്ന പ്രവണത ചിലയിടങ്ങളിൽ വിമർശിക്കപ്പെടുന്നു. ചില ഇന്ത്യൻ കുടിയേറ്റക്കാർക്ക് ആതിഥേയ രാജ്യത്തോട് വേണ്ടത്ര ബഹുമാനമില്ലെന്ന ആരോപണവും ഉയരുന്നുണ്ട്. മികച്ച തൊഴിൽ, ഉയർന്ന വേതനം, സാമൂഹിക സുരക്ഷ, പൊതുസൗകര്യങ്ങൾ എന്നിവ പ്രയോജനപ്പെടുത്തുമ്പോഴും അതേ രാജ്യത്തെക്കുറിച്ച് നിരന്തരം മോശമായി സംസാരിക്കുന്ന പ്രവണത പ്രാദേശികരിൽ അസ്വസ്ഥത ഉണ്ടാക്കുന്നുവെന്നാണ് വിമർശകർ പറയുന്നത്.
ജോലിസ്ഥലങ്ങളിലും വിദ്യാഭ്യാസ സ്ഥാപനങ്ങളിലും സ്വന്തം നാട്ടുകാരെ മാത്രം പ്രോത്സാഹിപ്പിക്കുന്ന പ്രവണത, മറ്റ് സമൂഹങ്ങളുമായുള്ള ഇടപെടലിൽ കാണുന്ന അകലം, സാമൂഹിക ഏകീകരണത്തോടുള്ള വിമുഖത എന്നിവയും ചില രാജ്യങ്ങളിലെ ചർച്ചാവിഷയങ്ങളാണ്. സ്ത്രീകളോടുള്ള സമീപനം, വ്യക്തിസ്വാതന്ത്ര്യത്തോടുള്ള ബഹുമാനം, പൊതുസ്ഥലങ്ങളിലെ പെരുമാറ്റം തുടങ്ങിയ വിഷയങ്ങളിലും ചില ഇന്ത്യൻ വംശജരുടെ പ്രവർത്തനങ്ങൾ വ്യാപക വിമർശനങ്ങൾക്ക് കാരണമായിട്ടുണ്ട്. ഇത്തരം ഒറ്റപ്പെട്ട സംഭവങ്ങൾ പോലും മുഴുവൻ ഇന്ത്യൻ സമൂഹത്തെയും പ്രതികൂലമായി ബാധിക്കുന്നു. അതേസമയം, ഈ വിമർശനങ്ങൾ ഒരിക്കലും ഇന്ത്യക്കാർക്കെതിരായ അക്രമത്തിനോ വിദ്വേഷത്തിനോ ന്യായീകരണമാകുന്നില്ല.
നിയമം ലംഘിക്കുന്നവരെ വ്യക്തികളായി കാണുകയും നിയമപരമായി നടപടി സ്വീകരിക്കുകയും ചെയ്യേണ്ടതാണ്. ഒരു വ്യക്തിയുടെ തെറ്റിന് മുഴുവൻ സമൂഹത്തെയും കുറ്റപ്പെടുത്തുന്നത് ജനാധിപത്യ മൂല്യങ്ങൾക്ക് വിരുദ്ധമാണ്. എന്നാൽ വിദേശ രാജ്യങ്ങളിൽ ഇന്ത്യക്കാരെതിരായ പ്രതികൂല വികാരങ്ങൾ വർധിക്കുന്നതിന്റെ കാരണങ്ങൾ പരിശോധിക്കുമ്പോൾ, വംശീയതയും കുടിയേറ്റവിരുദ്ധ രാഷ്ട്രീയവും മാത്രമല്ല, ഇന്ത്യൻ സമൂഹത്തിനുള്ളിൽ ആത്മപരിശോധന ആവശ്യമായ ചില വിഷയങ്ങളും ഉണ്ടെന്ന് സമ്മതിക്കേണ്ടിവരും. വിദേശത്ത് താമസിക്കുന്ന ഓരോ ഇന്ത്യക്കാരനും താൻ പ്രതിനിധീകരിക്കുന്നത് സ്വന്തം കുടുംബത്തെ മാത്രമല്ല, ഒരു രാജ്യത്തിന്റെ പ്രതിച്ഛായ കൂടിയാണെന്ന ബോധ്യത്തോടെ പെരുമാറേണ്ട സമയം അതിക്രമിച്ചിരിക്കുകയാണ്.
Follow the GNN24X7 IRELAND channel on WhatsApp: https://whatsapp.com/channel/0029Va4AM6UElagtUTDuQQ0S
Follow Us on Instagram!
GNN24X7 IRELAND :
🔗 https://www.instagram.com/gnn24x7.ie?igsh=YzljYTk1ODg3Zg==
