നിർദിഷ്ട ഐറിഷ് പൗരത്വ നിയമഭേദഗതികളിൽ നിലവിൽ അയർലണ്ടിൽ നിയമപരമായി താമസിക്കുകയും ജോലി ചെയ്യുകയും ചെയ്യുന്നവരുടെ സാഹചര്യം പ്രത്യേകം പരിഗണിക്കണമെന്ന് ക്രാന്തി അയർലൻഡ്. പൗരത്വത്തിനുള്ള പൊതുവായ താമസകാലാവധി അഞ്ച് വർഷത്തിൽ നിന്ന് എട്ട് വർഷമായും, ഐറിഷ് പൗരന്മാരുടെ പങ്കാളികൾക്കുള്ള താമസകാലാവധി മൂന്ന് വർഷത്തിൽ നിന്ന് അഞ്ച് വർഷമായും ഉയർത്താനുള്ള നിർദേശങ്ങൾക്കൊപ്പം പുതിയ ഭാഷാ, പൗരത്വ പരീക്ഷകളും പരിഗണിക്കുന്ന സാഹചര്യത്തിലാണ് സംഘടനയുടെ പ്രതികരണം.
നിലവിലുള്ള നിയമങ്ങൾ അടിസ്ഥാനമാക്കി വർഷങ്ങളായി അയർലണ്ടിൽ ജീവിതം കെട്ടിപ്പടുത്ത കുടുംബങ്ങൾക്ക് പുതിയ നിയമങ്ങൾ ബാധകമാക്കുമ്പോൾ വ്യക്തമായ ട്രാൻസിഷൻ കാലയളവ് ഉറപ്പാക്കണമെന്നാണ് ക്രാന്തി അയർലൻഡിന്റെ പ്രധാന ആവശ്യം. ആശുപത്രികൾ, നഴ്സിങ് ഹോമുകൾ, നിർമാണ മേഖല, ഗതാഗതം, വ്യാപാരം തുടങ്ങിയ വിവിധ മേഖലകളിൽ ജോലി ചെയ്യുന്നവരുടെ സംഭാവനകൾ പരിഗണിക്കണമെന്നും സംഘടന ചൂണ്ടിക്കാട്ടുന്നു.
IRP പുതുക്കലിലെയും ഇമിഗ്രേഷൻ നടപടികളിലെയും ഭരണപരമായ കാലതാമസം വ്യക്തികളുടെ താമസകാലാവധി കണക്കാക്കുന്നതിൽ അന്യായമായി ബാധിക്കരുതെന്നും, കോവിഡ് കാലത്തെ യാത്രാ നിയന്ത്രണങ്ങളും മറ്റ് തടസ്സങ്ങളും പരിഗണിക്കണമെന്നും ക്രാന്തി അയർലൻഡ് ആവശ്യപ്പെട്ടു.
ഐറിഷ് പൗരന്മാരുടെ പങ്കാളികൾക്കും അയർലണ്ടിൽ വളർന്ന കുട്ടികൾക്കും വ്യക്തവും പ്രവചനാതീതവുമായ പാത ഉറപ്പാക്കണമെന്നും സംഘടന ആവശ്യപ്പെട്ടു. പുതിയ ഭാഷാ, സിവിക്സ് പരീക്ഷകൾ നടപ്പാക്കുന്നുവെങ്കിൽ സൗജന്യവും വ്യക്തവുമായ പഠനസാമഗ്രികൾ ലഭ്യമാക്കണമെന്നും, പ്രസവാവധി, താൽക്കാലിക അസുഖം, കുടുംബപരിചരണം തുടങ്ങിയ സാധാരണ ജീവിതസാഹചര്യങ്ങൾ സാമ്പത്തിക മാനദണ്ഡങ്ങളിൽ പരിഗണിക്കണമെന്നും ആവശ്യപ്പെട്ടു.
നീതിയുക്തത, സ്ഥിരത, നിയമപരമായ ഉറപ്പ് എന്നിവ പൗരത്വ പരിഷ്കാരത്തിന്റെ അടിസ്ഥാനമാകണം എന്നാണ് ക്രാന്തി അയർലൻഡിന്റെ നിലപാട്. ആവശ്യങ്ങൾ ഉന്നയിച്ച് സംഘടന ഒപ്പുശേഖരണവും ആരംഭിച്ചിട്ടുണ്ട്.
https://www.change.org/CitizenshipIreland
Follow Us on Instagram!
GNN24X7 IRELAND :
https://www.instagram.com/gnn24x7.ie?igsh=YzljYTk1ODg3Zg==
Please join
https://chat.whatsapp.com/DMcx9ffd8nI5hZfAUsl96s?mode=hqrt3
GNN NEWS IRELAND നിന്നുള്ള പ്രധാന വാര്ത്തകളും, ബ്രേക്കിംഗ് ന്യൂസുകളും വാട്സാപ്പില് ലഭിക്കുവാന് താഴെയുള്ള ലിങ്കില് ക്ലിക്ക് ചെയ്ത് ജോയിന് ചെയ്യുക.
https://chat.whatsapp.com/Fvb5dzrOEnRCV2ReS4R7Gb
