കൊച്ചി: പൊലീസിന്റെ രഹസ്യ രേഖ സ്വർണക്കടത്ത് പ്രതി ചോർത്തിയ സംഭവത്തിൽ അന്വേഷണത്തിന് ഉത്തരവിട്ട് ഹൈക്കോടതി. മലപ്പുറം സ്വദേശി ഫസലു റഹ്മാനെതിരെ കൊഫെപോസ പ്രകാരം നടപടി എടുക്കാൻ നിർദേശിച്ചുള്ള വിവരമാണ് പൊലീസിൽ നിന്ന് ചോർന്നത്. കേന്ദ്ര ഇക്കണോമിക്സ് ഇന്റലിജൻസ് ബ്യൂറോ ഡിജിപിക്ക് നൽകിയതായിരുന്നു രഹസ്യ രേഖ. കത്ത് ചോർന്നതോടെ പ്രതി ഒളിവിൽപോയി. ഇതോടെ കോഫേപോസ പ്രകാരം ഫസലു റഹ്മാനെ കരുതൽ തടങ്കലിൽ ആക്കാനുളള നീക്കം പാളി. സംഭവം അതീവ ഗുരുതരമാണെന്ന് വിലയിരുത്തിയാണ് ഹൈക്കോടതി അന്വേഷണത്തിന് ഉത്തരവിട്ടത്. ഉത്തരവാദികൾക്കെതിരെ നടപടി വേണമെന്നും കോടതി നിർദേശിച്ചു. നവംബർ 28ന് റിപ്പോർട്ട് ഹാജരാക്കാൻ പൊലീസ് മേധാവിക്ക് കോടതി നിർദ്ദേശം നൽകിയിട്ടുണ്ട്.
