തൃശൂർ: ആളുകളില്ലാത്ത കുന്നിൻപ്രദേശത്ത് സ്ത്രീയുടെ മൃതദേഹം കത്തിക്കരിഞ്ഞ നിലയിൽ. വടക്കാഞ്ചേരിക്ക് സമീപം കുറാഞ്ചേരിയിലാണ് സ്ത്രീയുടെ മൃതദേഹം കത്തിക്കരിഞ്ഞ നിലയിൽ കണ്ടെത്തിയത്. വെള്ളിയാഴ്ച രാവിലെ എട്ടു മണിയോടെയാണ് കുന്നിൻമുകളിൽ കത്തിക്കരിഞ്ഞ നിലയിലുള്ള മൃതദേഹം കണ്ടെത്തിയത്.
സ്ത്രീയെ കൊന്ന് മൃതദേഹം കത്തിച്ചതിനു ശേഷം ഇവിടെ കൊണ്ടു വന്ന് ഉപേക്ഷിച്ചതാകാമെന്നാണ് പൊലീസിന്റെ പ്രാഥമിക നിഗമനം. മൃതദേഹത്തിന് നാലു ദിവസത്തെ പഴക്കമുണ്ട്. അതുകൊണ്ടു തന്നെ തിരിച്ചറിയാൻ കഴിഞ്ഞിട്ടില്ല. അതേസമയം, തിരിച്ചറിയൽ അടയാളമായി മൃതദേഹത്തിൽ ശേഷിക്കുന്നത് താലിമാല മാത്രമാണ്.
അതേസമയം, ഡോഗ് സ്ക്വാഡും വിരലടയാള വിദഗ്ദരും കൂടുതൽ പരിശോധനകൾ നടത്തും. ഏതെങ്കിലും പൊലീസ് സ്റ്റേഷനിൽ സ്ത്രീയെ കാണാനില്ലെന്ന് കാണിച്ച് പരാതി ലഭിച്ചിട്ടുണ്ടോയെന്ന് പൊലീസ് പരിശോധിച്ച് വരികയാണ്.