ചെന്നൈ: രാഷ്ട്രീയത്തിലേക്കില്ലെന്നും രാഷ്ട്രീയ പ്രചാരണത്തിന്റെ ഭാഗമായി രൂപീകരിച്ച രജനി മക്കൾ മൻട്രം ഇനി രജനി രസികഗർ നർപണി മൻട്രം എന്ന പേരിൽ സാമൂഹിക പ്രവർത്തനങ്ങൾ ഏറ്റെടുത്തു നടത്തുന്ന സംഘടനയായി പ്രവർത്തിക്കുമെന്നും രജനി മക്കൾ മൻട്രം ജില്ലാ സെക്രട്ടറിമാരുടെ യോഗത്തിനു ശേഷ൦ രജനികാന്ത് മാധ്യമങ്ങളെ അറിയിച്ചു.
2020 ഡിസംബറിലാണു രാഷ്ട്രീയ പ്രവേശന സൂചനകൾ രജനികാന്ത് നൽകിയത്. 2021 ജനുവരിയിൽ പാർട്ടിയുടെ പേരു പ്രഖ്യാപിക്കുമെന്നും അറിയിച്ചിരുന്നു. എന്നാൽ, അതേ ഡിസംബർ അവസാനം തന്നെ ആരോഗ്യനില സംബന്ധിച്ച ആശങ്കകൾ കാരണം രാഷ്ട്രീയത്തിലേക്കില്ലെന്ന് അദ്ദേഹം പ്രഖ്യാപിച്ചു.
നേരത്തെ വൃക്കമാറ്റ ശസ്ത്രക്രിയയ്ക്കു വിധേയനായ രജനിക്കു കൃത്യമായ ഇടവേളകളിൽ ആരോഗ്യപരിശോധനയുണ്ട്. യുഎസിലെ മയോ ക്ലിനിക്കിൽ ആരോഗ്യപരിശോധനകൾ പൂർത്തിയാക്കി കഴിഞ്ഞ ദിവസമാണു മടങ്ങിയെത്തിയത്.