റോം: ലോക്ക് ഡൗണിനെ തുടർന്ന് രണ്ടാഴ്ച്ച ജന്മനാടായ പോർച്ചുഗലിൽ തങ്ങിയ ശേഷം യുവന്റസ് താരം ക്രിസ്റ്റ്യാനോ റൊണാൾഡോ ഇറ്റലിയിലേക്ക് മടങ്ങി. തിങ്കളാഴ്ച്ച രാത്രിയാണ് റൊണാൾഡോയും കുടുംബവും ടൂറിൻ എയർപോർട്ടിലിറങ്ങിയത്.
പോർച്ചുഗീസ് ദ്വീപായ മഡെയ്റയിൽ നിന്ന് സ്വകാര്യ ജെറ്റ് വഴി ഇറ്റലിയിലെത്തിയ റൊണാൾഡോ വിദേശയാത്ര കഴിഞ്ഞ് വന്നതിനാൽ രണ്ടാഴ്ച്ച ക്വാറന്റൈനിൽ ആയിരിക്കും.
മാർച്ച് എട്ടിന് അലയൻസ് സ്റ്റേഡിയത്തിൽ ഇന്റർമിലാനെതിരെ 2-0ത്തിന് ജയിച്ച സീരി എ ഗെയിമാണ് റൊണാൾഡോ അവസാനമായി കളിച്ചത്. ഇറ്റാലിയൻ ഫുട്ബോൾ സീസൺ താത്ക്കാലികമായി നിർത്തിവെക്കുന്നതിന് മുൻപായിരുന്നു ഗെയിം.
സ്ട്രോക്ക് വന്ന അമ്മ ഡോളറുസുമായി സമയം ചിലവഴിക്കാനാണ് റൊണാൾഡോ പോർച്ചുഗലിൽ എത്തിയത്. സീരി എ ക്ലബ്ബുകളുടെ താരങ്ങൾക്ക് വ്യക്തിഗത പരിശീലനത്തിന് അനുമതി ലഭിച്ചതോടെയാണ് റൊണാൾഡോ ഇറ്റലിയിലേക്ക് മടങ്ങിയത്. ഇറ്റാലിയൻ ആഭ്യന്തര മന്ത്രാലയം കളിക്കാർക്ക് പരിശീലനത്തിന് അനുമതി നൽകിയത് 2019-2020 ഫുട്ബോൾ സീസൺ മടങ്ങിവരുമെന്ന പ്രതീക്ഷ ആരാധകർക്ക് നൽകിയിട്ടുണ്ട്.
