കോഴിക്കോട്: കൊവിഡ് 19 പടരുന്ന സാഹചര്യത്തില് രാജ്യത്ത് കേന്ദ്രസര്ക്കാര് പ്രഖ്യാപിച്ച ലോക്ക് ഡൗണ് ലംഘിച്ച് സംസ്ഥാന ബി.ജെ.പി അധ്യക്ഷന് കെ. സുരേന്ദ്രന്. ലോക്ക് ഡൗണ് പ്രഖ്യാപിക്കുന്ന മാര്ച്ച് 24 ന് കോഴിക്കോട്ടെ വസതിയിലായിരുന്ന സുരേന്ദ്രന് വ്യാഴാഴ്ച തിരുവനന്തപുരത്തെത്തി വാര്ത്താ സമ്മേളനം നടത്തിയതാണ് വിവാദത്തിലായിരിക്കുന്നത്.
ഡി.ജി.പിയുടെ അനുമതിയോടെയാണ് യാത്ര നടത്തിയതെന്നാണ് സുരേന്ദ്രന് അവകാശപ്പെടുന്നത്. അതേസമയം, സേവാ ഭാരതിയുടെ ചാരിറ്റി പ്രവര്ത്തനങ്ങള് നടത്താനെന്ന പേരില് യാത്രാ പെര്മിറ്റ് സംഘടിപ്പിച്ച വാഹനത്തിലായിരുന്നു യാത്ര നടത്തിയതെന്നാണ് സപെഷ്യല് ബ്രാഞ്ചിന് ലഭിച്ച വിവരം.
ലോക്ക്ഡൗണ് കാലയളവില് വളരെ അത്യാവശ്യ കാര്യങ്ങള്ക്കു മാത്രമേ പുറത്തിറങ്ങാവൂ എന്നിരിക്കെ ഇതെല്ലാം അട്ടിമറിച്ച് കോഴിക്കോട് മുതല് തിരുവനന്തപുരം വരെ പ്രത്യേകിച്ച് കാര്യമൊന്നുമില്ലാതെ യാത്ര ചെയ്യുകയായിരുന്നു കെ.സുരേന്ദ്രന്.
തീവ്രബാധിത പ്രദേശമായ കോഴിക്കോട് ജില്ലയില് നിന്നും ഒരു കാരണവശാലും മറ്റൊരു ജില്ലയിലേക്ക് പൊലീസ് യാത്ര അനുമതി ആര്ക്കും നല്കുന്നില്ല. അവശ്യ സര്വ്വീസുകള്ക്ക് മാത്രമാണ് പാസ് അനുവദിക്കുന്നത്.
തിരുവനന്തപുരത്ത് ചികിത്സക്കെത്താന് പോലും യാത്ര വിലക്ക് കാരണം വടക്കന് കേരളത്തില് നിന്നുള്ളവര് ബുദ്ധിമുട്ടുമ്പോള് എല്ലാ വിലക്കും ലംഘിച്ചുള്ള സുരേന്ദ്രന്റെ യാത്ര പൊലീസില് തന്നെ ചര്ച്ചയായിരിക്കുകയാണ്. പ്രധാനമന്ത്രിയുടെ ലോക്ക് ഡൗണ് നിര്ദേശം ബിജെപി അധ്യക്ഷന് തന്നെ മറികടന്നതിനെതിരെയും വിമര്ശനമുയരുകയാണ്.
