കോവിഡ് ബാധയേറ്റു മരിച്ചവരുടെ മൃതദേഹങ്ങൾ ആരോഗ്യപ്രവർത്തകരുടെ നേതൃത്വത്തിൽ വലിച്ചെറിയുന്ന വീഡിയോ സോഷ്യൽ മീഡിയയിൽ വൈറൽ. കർണാടകയിലെ ബെല്ലാരിയിൽ മാനദണ്ഡങ്ങൾ പാലിക്കാതെ, വലിയ കുഴിയെടുത്ത് മൃതദേഹങ്ങൾ മറവു ചെയ്യുന്നു എന്നാണ് ആരോപണം. ആരോഗ്യമന്ത്രി ബി. ശ്രീരാമലുവിന്റെ സ്വദേശം കൂടിയായ സ്ഥലത്ത് നടന്ന വിവാദ സംഭവത്തെ കുറിച്ച് അന്വേഷിക്കുമെന്ന് ജില്ലാ ഭരണകൂടത്തിലെ ഒരുയർന്ന ഉദ്യോഗസ്ഥൻ ഉറപ്പു നൽകി.
ഒരുവാഹനം നിർത്തിയിട്ട് അതിൽ നിന്നും മൃതദേഹങ്ങൾ പുറത്തേക്കെടുക്കുന്നത് കാണാം. കറുത്ത ഷീറ്റുകളിൽ പൊതിഞ്ഞ മൃതദേഹങ്ങൾ പി.പി.ഇ. കിറ്റ് ധരിച്ച ആരോഗ്യപ്രവർത്തകർ വലിച്ചെറിയുന്നതാണ് വീഡിയോയിൽ.
മണ്ണുമാന്തിയന്ത്രം ഉപയോഗിച്ച് മണ്ണുമാറ്റിയ ശേഷമാണ് വലിയ കുഴികളിൽ മൃതദേഹങ്ങൾ വലിച്ചെറിയുന്നത്. ഈ വീഡിയോ ആദ്യമായി യൂട്യൂബിൽ പോസ്റ്റ് ചെയ്ത ആളാണ് സ്ഥലം ബെല്ലാരി ആണെന്ന വാദമുന്നയിച്ചത്. സംഭവം വൻ വിവാദങ്ങൾക്ക് വഴിവച്ചിട്ടുണ്ട്.
