മോസ്കോ: ‘അയാളോടു പറഞ്ഞേക്കൂ, ഞാന് അവരെ തകര്ക്കുമെന്ന്’, യുക്രെയ്ന് പ്രസിഡന്റ് വൊളോഡിമിര് സെലന്സ്കിയുടെ സമാധാന ശ്രമങ്ങള്ക്ക് റഷ്യന് പ്രസിഡന്റ് വ്ളാഡിമിര് പുടിന് നല്കിയ മറുപടിയാണിത്. അനൗദ്യോഗികമായി സമാധാനശ്രമങ്ങള്ക്കു ചുക്കാന് പിടിക്കുന്ന റഷ്യന് പ്രഭു റോമന് അബ്രമോവിച്ച്, യുക്രെയ്ന് പ്രസിഡന്റ് സ്വന്തം കൈപ്പടയില് നല്കിയ കത്തുമായി എത്തിയപ്പോഴാണ് പുട്ടിന് ഇത്തരത്തില് പ്രതികരിച്ചത്.
റഷ്യയുടെ യുക്രെയ്ന് അധിനിവേശം ഒരു മാസത്തിലേറെ പിന്നിടുമ്പോഴും യാതൊരു വിട്ടുവീഴ്ചയ്ക്കുമില്ലെന്ന സൂചനയാണ് പുട്ടിന്റെ വാക്കുകളിലുള്ളത്. തുര്ക്കിയില് ഇരുരാജ്യങ്ങളും തമ്മില് ഇന്ന് ചര്ച്ച നടക്കാനിരിക്കെയാണ് പുട്ടിന്റെ പ്രതികരണം. യുദ്ധം അവസാനിപ്പിക്കുന്നതിന് യുക്രെയ്ന് മുന്നോട്ടു വയ്ക്കുന്ന ഉപാധികളാണ് സെലന്സ്കിയുടെ കത്തിലുണ്ടായിരുന്നത്. യുക്രെയ്ന്റെ അപേക്ഷ സ്വീകരിച്ചാണ് ചെല്സി ഫുട്ബോള് ക്ലബ് ഉടമ കൂടിയായ റോമന് അബ്രമോവിച്ച് സമാധാന ശ്രമങ്ങള്ക്കായി പുട്ടിനെ സന്ദര്ശിച്ചത്.
