വാഷിംഗ്ടണ്‍: കൊവിഡ് 19 നെത്തുടര്‍ന്ന് അമേരിക്കയില്‍ മരിച്ചവരുടെ എണ്ണം വെള്ളിയാഴ്ച 5000 ആയി. പത്ത് ദിവസത്തിനുള്ളില്‍ മരണം ഇരട്ടിയായതായി റോയിട്ടേഴ്‌സ് റിപ്പോര്‍ട്ട് ചെയ്യുന്നു. അമേരിക്കയില്‍ 8,75,000ത്തിലധികം ആളുകള്‍ക്ക് കൊവിഡ് 19 പിടിപെട്ടിട്ടുണ്ട്.
ലോകത്തില്‍ ഏറ്റവും കൂടുതല്‍ കൊവിഡ് മരണം നടക്കുന്നത് അമേരിക്കയിലാണ്. 1950-53ലെ കൊറിയന്‍ യുദ്ധത്തില്‍ കൊല്ലപ്പെട്ട മൊത്തം അമേരിക്കക്കാരുടെ എണ്ണത്തെക്കാള്‍ കൂടുതലാണ് കൊവിഡ് ബാധിച്ച് അമേരിക്കയില്‍ മരിച്ചവരുടെ എണ്ണം.
അതേസമയം കൊവിഡ് 19 ബാധിച്ച് ലോകത്ത് മരിക്കുന്നവരുടെ എണ്ണം രണ്ട് ലക്ഷത്തിലേക്ക് അടുക്കുകയാണ്. 195218 പേരാണ് കൊവിഡ് ബാധിച്ച് ഇതുവരെ മരിച്ചത്. 2,801,065 പേര്‍ക്ക് ഇതുവരെ രോഗബാധ സ്ഥിരീകരിച്ചിട്ടുണ്ട്. യു.എസിലും യു.കെയിലുമാണ് വെള്ളിയാഴ്ച ഏറ്റവും കൂടുതല്‍ കൊവിഡ് മരണങ്ങള്‍ റിപ്പോര്‍ട്ട് ചെയ്തത്.
യു.എസില്‍ 752 പേരാണ് വെള്ളിയാഴ്ച മരിച്ചത്. യു.കെയില്‍ 768 പേര്‍ മരിച്ചു. ഇറ്റലിയില്‍ 25,969 പേര്‍ മരിച്ചു. സ്പെയിനില്‍ 22,524 പേരും ഫ്രാന്‍സില്‍ 22,245 പേരും മരിച്ചു.ബ്രിട്ടനില്‍ ഇതുവരെ 19,506 പേരാണ് മരിച്ചത്.
