മുംബൈ: ലഹരിവിരുന്ന് കേസുമായി ബന്ധപ്പെട്ട് ഇന്റർനെറ്റിൽ കഴിഞ്ഞ ദിവസം ഏറ്റവും കൂടുതൽ തിരയപ്പെട്ടത് ഷാറുഖ് ഖാന്റെ മകൻ ആര്യൻ ഖാനൊപ്പം അറസ്റ്റിലായ മുൺമുൺ ധമേച്ഛയെ കുറിച്ചുള്ള വിവരങ്ങളാണ്. മോഡലും സമൂഹമാധ്യമ സെലിബ്രിറ്റിയുമായ മുൺമുൺ വ്യവസായ കുടുംബത്തിലെ അംഗമാണ്.
മുംബൈ തീരത്ത് ആഡംബര കപ്പലിലെ ലഹരിവിരുന്ന് നടത്തിയ കേസിൽ എട്ടുപേരെയാണു നർകോട്ടിക്സ് കൺട്രോൾ ബ്യൂറോ (എൻസിബി) അറസ്റ്റ് ചെയ്തത്. ലഹരിമരുന്ന് കൈവശം വച്ചതിനും ഉപയോഗിച്ചതിനുമാണ് കേസ്.
മധ്യപ്രദേശിലെ സാഗർ ജില്ലയിലെ തെഹ്‌സിൽ സ്വദേശിയാണ് മുൺമുൺ. സാഗറിൽ സ്കൂൾ പഠനം പൂർത്തിയാക്കിയ മുൺമുണിനെപ്പറ്റി നാട്ടിൽ പലർക്കും പക്ഷേ കൂടുതൽ വിവരങ്ങളില്ല. കുറച്ചുകാലം ഭോപാലിൽ താമസിച്ച മുൺമുൺ, ആറു വർഷം മുൻപാണു സഹോദരനൊപ്പം ഡൽഹിയിലേക്കു താമസം മാറിയത്. സമൂഹമാധ്യമങ്ങളിൽ, പ്രത്യേകിച്ചും ഫോട്ടോ ഷെയറിങ് ഇടമായ ഇൻസ്റ്റഗ്രാമിൽ വളരെ സജീവമാണ് മുൺമുൺ. 11,000 ഫോളോവേഴ്സാണുള്ളത്. ലഹരിക്കേസിനു പിന്നാലെ ഫോളോവേഴ്സിന്റെ എണ്ണം കൂടുന്നുമുണ്ട്. ഫാഷൻ ഷോകളിലെ ഉൾപ്പെടെ നിരവധി ചിത്രങ്ങളാണ് മുൺമുൺ സമൂഹമാധ്യമങ്ങളിൽ പങ്കുവച്ചിട്ടുള്ളത്. ആര്യനുമായി മുൺമുൺ നല്ല അടുപ്പത്തിലാണെന്നു റിപ്പോർട്ടുകളിൽ പറയുന്നു. സംഘാടകർ തന്നെ അതിഥിയായി ക്ഷണിച്ചതാണെന്നും പണം അടച്ച് കപ്പലിൽ ടിക്കറ്റ് എടുത്തിട്ടില്ലെന്നുമാണ് ആര്യൻ അന്വേഷണസംഘത്തോടു പറഞ്ഞത്. ആര്യന്റെ ഉറ്റസുഹൃത്ത് അർബാസ് സേത്ത് മർച്ചന്റും അറസ്റ്റിലായിട്ടുണ്ട്.
