ഏറെ കാത്തിരുന്ന ക്രിസ്റ്റഫർ നോളൻ ചിത്രം ടെനറ്റ് റിലീസ് തീയതി പ്രഖ്യാപിച്ചു. സിനിമയുടെ നിർമാതാക്കളായ വാർണർ ബ്രോസ് ആണ് ഔദ്യോഗികമായി ഇക്കാര്യം അറിയിച്ചത്.
കോവിഡ് 19 ലോക്ക്ഡൗണിനെ തുടർന്നാണ് ചിത്രത്തിന്റെ റിലീസ് നീണ്ടുപോയത്. ആരാധകരും സിനിമാ ലോകവും ഒരുപോലെ കാത്തിരുന്ന ചിത്രത്തിന്റെ റിലീസ് തീയ്യതി ഒടുവിൽ പ്രഖ്യാപിച്ചിരിക്കുകയാണ്.
ജുലൈ 31 ന് ചിത്രം പുറത്തിറങ്ങും. ടെനെറ്റ് കൂടാതെ കൂടുതൽ ഹോളിവുഡ് ചിത്രങ്ങളും റിലീസിന് ഒരുങ്ങുകയാണ്. ജുലൈ മാസത്തോടെ തിയേറ്ററുകൾ തുറക്കാനാണ് തീരുമാനം. ഇതോടെയാണ് ചിത്രങ്ങളുടെ റിലീസ് പ്രഖ്യാപിച്ചിരിക്കുന്നത്.
മാർവൽ സ്റ്റുഡിയോസിന്റെ ബ്ലാക്ക് വിഡോ, ഫാസ്റ്റ് ആന്റ് ഫ്യൂരിയസ്-9, വണ്ടർ വുമൺ 1984 എന്നീ ചിത്രങ്ങളാണ് ടെനറ്റിന് പിന്നാലെ പുറത്തിറങ്ങുന്നത്. വണ്ടർ വുമൺ ഒക്ടോബർ 2 ന് തിയേറ്ററുകളിലെത്തുമെന്ന് ഇതിനകം പ്രഖ്യാപിച്ചു കഴിഞ്ഞു.
ടെനറ്റിന് മുമ്പായി ജുലൈ 24 ന് ഡിസ്നിയുടെ മുലാൻ പുറത്തിറങ്ങും.
