ന്യൂഡൽഹി: ഇന്ത്യയിൽ കോവിഡ് ബാധിതരുടെ എണ്ണം 50 ലക്ഷം കടന്നു. 24 മണിക്കൂറിനിടെ 90,123 പേർക്ക് കൂടി കോവിഡ് ബാധിച്ചതോടെ രാജ്യത്തെ രോഗികളുടെ എണ്ണം 50,20,360 ആയി. ഒരാഴ്ചയായി പ്രതിദിനം ഒരുലക്ഷത്തോളം പേർക്കാണ് രോഗബാധ ഉണ്ടാകുന്നത്.
24 മണിക്കൂറിനകം 1290 കോവിഡ് മരണവും റിപ്പോർട്ട് ചെയ്തു. ഇതോടെ കോവിഡ് മരണസംഖ്യ 82,066 ആയി. ഔദ്യോഗിക കണക്ക് പ്രകാരം മരണനിരക്ക് 1.63 ശതമാനമാണ്.
അതേസമയം, രാജ്യത്ത് കോവിഡ് രോഗമുക്തി 78.53 ശതമാനമായി ഉയർന്നു. ഇതുവരെ 39.42 ലക്ഷം പേരാണ് രോഗമുക്തി നേടിയത്. നിലവിൽ 9,95,933 രോഗികളാണ് ചികിത്സയിലുള്ളത്.
കോവിഡ് അതിരൂക്ഷമായി ബാധിച്ച മഹാരാഷ്ട്രയിൽ രോഗബാധിതരുടെ എണ്ണം 10.7 ലക്ഷമായി ഉയർന്നു. കഴിഞ്ഞ ദിവസം 17000ത്തിലധികം കേസുകളാണ് റിപ്പോർട്ട് ചെയ്തത്.
